ميار الببلاوي تتراجع عن انتقاد شيرين عبد الوهاب: اللفظ خانني وهعمل عمرة عشان استغفر ربنا

محمد سلطان محمود | فى حياة المشاهير

ميار الببلاوي

الخميس , 25 أغسطس 2022 - 22:08

كشفت الفنانة المعتزلة والمذيعة ميار الببلاوي عن ندمها على تصريحاتها حول وزن الفنانة شيرين عبد الوهاب.

ونفت ميار الببلاوي في مداخلة هاتفية مع برنامج "خط أحمر" من تقديم محمد موسى، أن تكون قد انتقدت شيرين عبد الوهاب بحثا عن تريند مواقع التواصل الاجتماعي.

وأوضحت: "والله ما كنت عايزة أتصدر ولا أي حاجة، كل اللي كنت عايزاه، إني زعلت عليها لما شفتها كده، بس يمكن خانني اللفظ، كنت عايزة أقول لها بس مكنتش لاقية إطار أحط فيه الكلام".

نرشح لك- بتلك الطريقة.. نسرين طافش تحسم الجدل حول انفصالها عن زوجها

وتابعت ميار الببلاوي: "النهاردة في برنامجي الشيخ قال لي إن ده يعتبر نوع من الغيب، واتصدمت وأنهرت على الهوا وقعدت استغفر ربنا، ويمكن أطلع عمرة قريب جدا عشان استغفر عن الموضوع ده، من كتر ما الشيخ عنفني وقال لي إنتي ست معاكي دكتوراة في الفقه وماينفعش نتكلم عن الناس أو نتنمر عليهم".

وقالت: "أنا لما اتكلمت كده كنت برد دين، في وقت من الأوقات كنت مطلقة وصغيرة ومعايا ابن ولابسة الحجاب جديد ومش عارفة أعمل أيه، واحدة قعدت جنبي في المسجد قالت لي الكام كلمة اللي قلتهم لشيرين، وفرقوا معايا في حياتي، وكل ما أجي أقع افتكر الكلمة، عشان كده كنت عايزة شيرين تقف على رجليها".

وأكملت ميار الببلاوي متحدثة عن حسام حبيب: "يعني هو عايش حياته، وصعب عليا تعليقاته على السوشيال ميديا، هو مستمتع وبيهيص ويفرح ويضحك وهي منهارة ومتدمرة وبتاخد أدوية اكتئاب وبتتعالج نفسيا ووزنها يزيد ومش مهتمة بنفسها، كل التفاصيل دي كانت على مسلمة بتحب مسلمة، مش ميار بتحب مطربة".

وأكدت: "أنا مش خبيثه وربنا شاهد علي، كانت النصيحة اللي اتقلبت عليا وجت لي مكالمات دولية، واحدة شتمتني شتايم صعبة وقعدت تدعي عليا وقالت لي هخلي شيرين تديكي بالجزمة، عمري في حياتي ما اتشتمت بالطريقة دي مع إني معملتش حاجة".

واختتمت ميار الببلاوي حديثها مؤكدة أنها قدمت النصيحة رغبة منها في أن تدعم شيرين عبد الوهاب وأي امرأة أخرى في نفس موقفها، وتراهن أقوى ما هن عليه.