تامر حسني لليائسين والمحبطين: افتكروا معاناتي .. اشتغلت في الفاعل وعامل بنزينة

محمد سليم | فى سينما وتلفزيون

تامر حسني

الاثنين , 15 أغسطس 2022 - 19:22 | اخر تحديث: الاثنين , 15 أغسطس 2022 - 19:22

وجه الفنان تامر حسني رسالة لجمهوره عبر حساباته في مواقع التواصل الاجتماعي، شجعهم فيها على عدم الاستسلام لشعور الإحباط واليأس.

جاء ذلك بعد استجابة متابعي تامر حسني لرسالته السابقة لهم، والتي دعاهم فيها للتواصل معه وطرح المشكلات التي تواجههم، بحيث يناقشها معهم من واقع خبرته.

نرشح لك - "الله يقرفك".. محمد رمضان يرد على اتهامه بالظهور في وضع مخل مع رجل آخر

تامر حسني

وقال تامر حسني في رده على متابعيه: "قرأت معظم التعليقات على قد ما قدرت على اخر بوست ليا، وفهمت اكتر حاجتين من تعليقاتهم عاملين احباط لمعظمكم.
1 - اليأس من النجاح
2 - احباط المقربين

و بعضكم واصل لفقدان الامل و الشغف، و بعضكم فاقد الامل في الحياه نفسها".

وأضاف: "هطلب طلب منكم قبل اي شيء افتكروا معاناتي في بدايتي و ظروفي الصعبه من غير اب و من غير اي فلوس، و بنزل اشتغل في الشوارع من عامل بنزينه لسوبر ماركت لفاعل، يعني اللي بيبنوا العمارات بطلع طوب و اسمنت عشان ارجع بيتي لامي الغلبانه بأي خمسه جنيه، بالإضافه لمرتب النادي لما كنت بلعب كوره كان مرتبي 22 جنيه في الشهر، منهم بقى تحويشة الميه و الكهربا، و عمليات اخويا عشان كان عيان لفتره كبيره. كنت بعمل المستحيل فعلاً عشان امي و اخويا و عشان اوصل لهدفي، كان جوايا سعي دائم لطريقين الكوره و الغناء، و بقول دا عشان ناس كتير عايز انصحها بالخطه البديله عشان لو الحلم مجاش يكون في غيره، زي ما انا كان نفسي ابقى لاعب كوره و الكوره مش ليا و الانديه كلها مشوني، رغم تفوقي كنت بسأل نفسي ليه الابواب كلها بتتقفل في وشي، اتاريها بتتقفل عشان توجهني لمسار اخر، و لما آمنت بكده فهمت قدام ان ربنا كان شايلي الاحسن ليا بس ساعتها مكنتش فاهم، واللي بيسأل نفسه دلوقتي يعني انا اكمل في حلمي ولا اشوف حلم تاني هقوله دايماً اطلب من ربنا يساعدك هتلاقي علامات بتجيلك بس الشاطر اللي يفهمها، علامات هتأكدلك تكمل او لا بس اجتهد و اتعب عشان المجهود دا ليه كرم متحوشلك في مجالك التاني، ف اوعى تقول تعبت عالفاضي".

طالع أيضا - يبدأ بـ هشام عباس والختام مع عمر خيرت ... المواعيد الجديدة لحفلات مهرجان القلعة للموسيقى

تامر حسني

وتابع: "و بالنسبه للمحبطين هيفضلوا موجودين انت اللي بتسمعلهم، و انت اللي بتسمح انك تتأثر بيهم، امنع دا فوراً متبقاش السبب في اذية نفسك، متتشدش غير لكل جميل و لكل ايجابي هتلاقي كل الحلو بيجيلك، و متعملش العكس عشان هيجيلك برضو، عشان كدا بقولك انت السبب دايماً قول يارب و اجتهد و افهم ان الراحه المطلقه في الجنه بس، و احنا على الارض و ربنا قال انه خلقنا في كبد، يعني شقاء عشان يكون عندنا تحدي نكسبه ولازم نكسبه، عشان كتير قبلينا كانت ظروفهم اصعب و وصلوا يبقى الموضوع فينا، متبقاش اكبر عدو لنفسك، انت السبب، خد قرار صارم فوراً في التغير و النهوض و النجاح ، والله هتوصل، متسمعش غير لقلبك و سلم قلبك للّي خلقه و توكل على الله".