مايان السيد تتحدث عن تصميماتها: أنا بنوتة في نفسي.. واخترت اسم ماما لملابس المحجبات

محمد سلطان محمود | فى حياة المشاهير

مايان السيد

11 أغسطس 2022 | اخر تحديث: الخميس , 11 أغسطس 2022 - 20:08

كشفت الفنانة مايان السيد كواليس إطلاقها خط للأزياء الصيفية من تصميماتها.

وأوضحت مايان السيد في بث مباشر عبر Instagram أنها حققت أحد أحلامها بإطلاق خط الأزياء الخاص بها.

وقالت: " كان حلم من أحلامي، مش أولوية، مش أهم حاجة في حياتي، أكيد التمثيل أهم، خصوصا إن أنا بنوتة أوي في نفسي لو ماخدتوش بالكم، وباحب الأزياء".

نرشح لك- حسن شاكوش يرد على اتهامه بتقليد محمد رمضان: كاريزمتي في حتة لوحدها (فيديو)

أزياء مايان السيد

وتابعت مايان السيد أنها تدرس المسرح في الجامعة، ويتضمن ذلك تعلم تصميم الأزياء الشخص، موضحة: "بنرسم وبنعمل لبس وكده للشخصيات".

وأكدت أن إحدى شركات الأزياء تواصلت معها لعرض فكرة تقديم خط أزياء يحمل اسمها، وقالت: "اتحمست وحسيت أنها هتكون تجربة لي إني أدخل العالم ده وبدأنا نشتغل، اخترت الصيف، بحب الصيف جدا ولبس البحر وبالليل وخروجات الساحل والجونة".

وأشارت إلى أنها اختارت أن يكون خط الأزياء مخصص للملابس الصيفية المناسبة للسهرات، قائلة:"قليل أوي لما بلاقي محلات بتبيع حاجات لبليل، وقلت لازم اعملها، واخترت ألوان فاقعة، والأسود والأبيض".

أزياء مايان السيد

وأضافت مايان السيد أنها تلقت نصيحة من إحدى صديقاتها بأن تكون الملابس مناسبة لكل الفتيات وليس النحيفات فقط، موضحة: "إحنا عايشين في مصر وعرب وإحنا جسمنا مش كده، وأخدت كلامها بعين الاعتبار، وعملت لبس يناسب كل الأجسام، صاحباتي برضه عاديين زينا، ففكرت أعمل لبس يناسبهم".

وواصلت: "طبعا هيبقى في حاجات ضيقة للي بيحبوا اللبس الضيق، بسبب عملت حاجة تناسب الـHour Glass shape".

وقالت مايان السيد إنها اختارت ألوان زاهية لتناسب السمراوات، خاصة أن إثنين من شقيقاتها سمراوات البشرة.

وتحدثت عن اختيارها أسماء الموديلات التي صممتها قائلة: "قررت إني اسمي كل outfit باسم حد مهم في حياتي، خصوصا الستات، لأن الخط ده أنا عاملاه للست، البنت الجريئة الواثقة في نفسها القوية المرحة، اللي بتحب تسافر وتخرج وتروح البحر، طبعا كل البنات كده مش بنت معينة".

أزياء مايان السيد

وتطرقت مايان السيد إلى ملابس المحجبات قائلة إنها اختارت إهداءه لوالدتها: "عاملاه للبنات المحجبة وأنا مامتي رضوي اتحجبت قريب، ألف مبروك يا ماما، فسميته فستان رودي، عشان ماما دلعها رودي".

كما منحت اسمها لفستان أخر، يعبر عن شخصيته وأطلقت عليه فستان ميونة، موضحة: "ده دلعي وعارفة إن ده كلام عليه كتير وتريقة كتير، بس هو دلعي وأنا بحبه".

كما أطلقت مايان السيد اسم أميرة أديب على فستان أخر، وفساتين أخرى على أسماء دلع شقيقاتها وبعض صديقاتها.