حنان ترك: أنا جاهلة سياسيا ولست داعية إسلامية.. صِعب علي نفسي من أصحابي وحبايبي وقولت معقولة نسيوني!

مي جودة | فى حياة المشاهير

حنان ترك

الجمعة , 3 يونيو 2022 - 02:11 | اخر تحديث: الجمعة , 3 يونيو 2022 - 02:12

في ظهور نادر، أطلت النجمة المعتزلة حنان ترك على جمهورها من خلال فيديو مباشر عبر حسابها Facebook من صفحتها الموثقة لتطمئنهم عليها.

قالت حنان ترك في البث المباشر: "أنا عندي برد كان المفروض أطلع من أسبوع فات ومحبتش أتاخر عليكوا واستحلمونى واستحملوا صوتي، عاوزة أشكركم وأشكر أسرتي اللي وقفت جانبي وقت مرضي وكل أصدقائي اللي بيسألوا عليا ودكتور أشرف زكي كان بيكلمنى وبيطمن عليا، وبشكر الجمهور اللى بدعواته الحمد لله بقيت أحسن بكتير وكويسة جدا، ومش عارفة أشكركوا على ايه ولا ايه وسعيدة انى معاكم وانتوا وحشتونى جدا".

وأضافت: عوزاكم تساعدوني على أي حد بيتكلم باسمي، أنتم اللى تقفوا لأنكوا عارفين حنان ممكن تقول ايه ومتقولش ايه، لأن كان في صفحات كتير باسمي بيتكلموا باسمي في الدين وفي السياسة، وأنا مليش علاقة بها وعمر ما أنزل بوستات بالشكل ده".

وتابعت: "أولا سياسيا أنا جاهلة جدا، ومعنديش وعي سياسي أني اعرف أقول اعملوا حاجة او متعملوش ومعنديش الثقافة اللى تخليني أنظر سياسياً، أما بالنسبة للدين، قلتها زمان وهاقولها تاني، أنا درست علوم شرعية على سبيل النجاة وليس على سبيل الدعاة، والدعوى دى موضوع كبير جدا ومحتاج علم وفقه مش أي حد يقدر يعملها، أنا فين والكلام الكبير ده فين.

واستكملت: أى حاجة نزلت على لساني ويقولوا حنان قالت فتوى وإن ربنا غضبان على فلان، أنا مليش علاقة خالص، أنا لا بحرم ولا بحلل ولا الكلام ده له أي علاقة بيا، وأنا مقدرش افتى في دين ربنا، وده له ناسه، ونصيحة لكل الناس، لما تحب تاخد نصيحة خدها من أهل العلم والناس المسؤولين عن الفتوى ومصرح لهم بها".

وكشفت حنان ترك أنها ستقاضي كل من نشر تصريح باسمها لأنه سبب لها العديد من المشاكل، موضحة: "صعب عليا نفسي لما لقيت اصحابي وحبايبي اللي عرفوني كويس زعلوا مني، بسبب حاجات انا ماليش علاقة بيها وعمري ما قولتها، وقولت معقولة نسيوني للدرجة دي، بصراحة خدت على خاطري، يعني ممكن يفتكروا أني أقول الكلام دا، بس الحمدلله ربنا أنصفني وعرفت أوثق الصفحة بتاعتي".

وفي نهاية الفيديو، وعدت حنان محبيها بالظهور لهم من جديد من خلال صفحتها وقناتها عبر موقع YouTube للحديث معهم والاطمئنان عليها.