"لعب في ظروف إرهابية" .. أمير طعيمة يلخص مشكلة محمد صلاح مع المنتخب في 9 نقاط

محمد سليم | فى حياة المشاهير

أمير طعيمة

الخميس , 31 مارس 2022 - 00:44 | اخر تحديث: الخميس , 31 مارس 2022 - 00:45

وجه الشاعر أمير طعيمة رسالة لمتابعي حسابه بموقع التواصل الاجتماعي فيسبوك، تحدث فيها عن مسيرة نجم المنتخب الوطني ونادي ليفربول الإنجليزي محمد صلاح مع المنتخب، ومباراة مصر والسنغال مساء الثلاثاء.

وكتب أمير طعيمة عبر حسابه: "أقولك مشكلة صلاح مع المنتخب في شوية نقاط:

نرشح لك - رمضان 2022- تعرف على شخصيات أبطال "الاختيار 3".. خالد الصاوي يجسد خيرت الشاطر

1 - الناس بتتعامل مع صلاح إنه طالما هو أحسن لاعب في العالم يبقى دوره إن منتخب مصر يبقى أحسن منتخب في العالم، و مدرب المنتخب يبقى في إمكانيات كلوب، و اتحاد الكرة يبقى زي الاتحاد الاوروبي و الانجليزي.

2 - صلاح لما بيبقى مش في يومه، المنتخب بيخسر، أما في ليفربول فيه فريق متكامل بيشتغل و بيقدر يكسب.

3 - فيه ناس أصلا حاقدين عليه من غير حاجة، دول اللي راقدين في الدرة و مستنيين أي جنازة يشبعوا فيها لطم، إزاي واحد كان غلبان و أقل منهم في كام سنة يبقى من أهم و أغنى الرياضين في العالم.

4 - إنت مش بتعامل صلاح على إنه لاعب فذ إنت بتعامله على إنه سوبر مان، لدرجة إنك لمته لما كسبنا الكاميرون في ضربات الجزاء لمجرد إننا ما وصلناش لضربة الجزاء الأخيرة عشان يسدد و يكسبك هو، و نفس الأمر في النهائي مع السنغال إنت لمته علي ضربة جزاء ما سددهاش.

5 - صلاح مكانش في يومه فعلا إمبارح و ضيع ضربة جزاء، بس إنت نسيت إنك ضيعت 3 ضربات جزاء من 4 و اللي دخلت أصلا دخلت بالتيلة، في مباراة اتلعبت في ظروف إرهابية غير مسبوقة تفوق بكتير مباراة الطوبة الشهيرة في 93 اللي اتعادت و مباراة امبارح مش هتتعاد عشان إحنا طيبين.

6 - صلاح جاب هدف الفوز في الذهاب، يعني لو اتعادلت أو كسبت بضربات الجزاء كنت هتوصل، بس إنت استنيته يطلع نار من بقه برضه و يتصرف في يوم من أسوأ أيامه كرويا.

7 - مجرد وجود صلاح في الملعب بيخسر المنافس لاعبين أو تلاتة بيراقبوه و إنت ما بتستفيدش من ده و بتستنى برضه صلاح اللي يحل بدل ما تستفيد من الزيادة العددية النظرية اللي بتبقى موجودة.

8 - الأهم من ده كله: منتخب مصر الحالي منتخب جيد و مش ممتاز و لا جيد جدا، و جيد دي ما تخليش منتخب مصر يلعب نهائي أفريقيا و لا مباراة فاصلة من الأساس لأنك في السكة بتقابل منتخبات جيدة جدا و ممتازة و حسابيا بتبقى فرصتها أفضل، و صلاح له دور كبير إنك أصلا توصل للمباريات دي بجانب إن اللعيبة رجالة بتموت نفسها و ما بتوفرش نقطة عرق.

‎ ‎صورة‎ ‎

9 - و أخيرا: فيه مجموعة من اللاعبين الموجودين مبدعين و البناء عليهم ممكن يخليك منتخب أفضل بكتير و مش هقول أسماء احتراما للاعبين آخرين عملوا اللي عليهم في حدود إمكانياتهم.

الصورة المرفقة: جدارية اتعملت امبارح لمحمد صلاح من جماهير ليفربول في الطريق إلى ملعب الأنفيلد".

يذكر أن محمد صلاح تعرض لمحاولات تشويش بأضواء الليزر أثناء استعداده لتسديد ركلة الجزاء أمس، واهتمت الصحف العالمية بنتيجة المباراة، وتركز اهتمامها على الليزر الذي تم تسليطه من قبل الجماهير على محمد صلاح خلال تسديد الركلة الترجيحية الأولى التي أهدرها.

‎ ‎صورة‎ ‎

وفي أول تعليق له على المباراة، قال محمد صلاح خلال كلمته مع لاعبي المنتخب في وجود أشرف صبحي وزير الشباب والرياضة، إنه فخور بالتواجد مع هذا الجيل، والجميع قدم أقصي ما عنده.

وأضاف : "تحدثت مع اللاعبين وأكدت لهم أنني فخور بتواجدي معهم، بالرغم من مشاركتي مع الجيل القديم مع وائل جمعة، ولكن هذا الجيل من أفضل الأجيال في مصر".

وتابع، : "مرة أخري أنا ليا الفخر أن أكون معاكم سواء كنت موجود معاكم أو لا".