حمو بيكا يشكر نجيب ساويرس: يدعم الفن بجميع فئاته

محمد أحمد | فى موسيقى وحفلات

ساويرس وحمو بيكا

الأربعاء , 24 نوفمبر 2021 - 20:11

وجه مطرب المهرجانات حمو بيكا الشكر لرجل الأعمال نجيب ساويرس لدعمه أغاني المهرجانات على حد قوله.

نرشح لك - نقابة الموسيقيين في بيان جديد: قوى ظلامية تتعمد تشويه الأغنية المصرية

ونشر حمو بيكا صورة لنجيب ساويرس عبر صفحته على Facebook وعلق عليها قائلا: "شكراً لرجل الأعمال المحترم نجيب ساويرس على دعمه الدائم للفن بجميع فئاته.. وبالاخص فن المهرجانات".

وعلق حمو بيكا منذ قليل على تصريحات الفنان هاني شاكر في مؤتمره الصحفي الذي أقامه لتفسير أسباب منع مطربي المهرجانات من الغناء.

ومن أبرز ما قاله بيكا في فيديو بث مباشر عبر تطبيق Instagram:

- لقيت ندوة كبيرة معمولة والدنيا مقلوبة علينا، وبيستهزءوا بينا، وفيها ممثلين واحد اسمه تامر عبد المنعم، وطالع يقول مش هتكلم غير لما الناس تنزل من على المسرح، المكان اللي انت واقف عليه اسمه منصة، المسرح للمغنيين.

- كلها بتتكلم باسم مصر، أنا مصري وأحمل هوية مصرية، ويمكن عندي ولاء أكتر منكم في البد دي، مش كل واحد يطلع يقول مصر مصر.

- كنت أنت فين وأنا وجمهوري نازلين في عيد أكتوبر وعاملين احتفالية كبيرة في الميدان.

- أنتم ليه بتتنمروا علينا، أو ليه شايفينا حشرت أو زبالة، أو مش ولاد ناس، أحنا ولاد ناس ومتربيين".

- ماتستهزأش بي، عصر أم كلثوم وعبد الحليم دا كان زمان خلاص مش دلوقتي خالص.

- احنا في 2021 دا جيلنا وعصرنا احنا بعد إذنكم، مايكونش واحد عنده 50 أو 60 سنة يتكلم مع واحد عنده 30 25 سنة.

- زي ما سمعناكم لازم تسمعونا، وزي ما كنا جمهوركم أنتم لازم تبقوا جمهورنا.

- البلد دي فيها قانون وحقنا هناخده بالقانون، ملكش إن أنت تمنعني.

- من ضمن التصريحات في االندوة (عايزين يغنوا يغنوا برا مصر)، ليه نغني برا مصر! دي بلدنا زي ما هي بلدك، محدش يمنعنا.

- احنا في بلد حرية وتقدم مستمر في عصر السيد الرئيس عبد الفتاح السيسي.

- بنطلع برا نتكرم وهنا بتكرمونا بالإهانة والشتيمة والبهدلة، ارحمونا شوية.

- نور وعلي من ضمن فرقتي تم استخراج تصاريح لهم، هيعملوا بيها ايه؟ هم بيغنوا معايا أنا بس.

- قدمت ورقي كله سليم، ودخلت وطلبوا مني في اللجنة الغناء لـ(أم كلسون) وحليم، أغني ايه وأنا مالي، انتم ليه ليه عايزين تحطوني في الحتة دي، أنا مطرب مهرجانات وجاي لك بجمهوري اللي بيحبني وبيحب فني، أنا راجل بغني مهرجانات ملكش ان أنت تمنعني، قيمني وقيم الفن بتاعي.

- في مسئولين كبار هيقفوا في ضهرنا ويدعمونا، احنا اللي نزلنا الميادين للاحتفال بنصر أكتوبر بجمهورنا وناسنا.

-أنا مصري وجسمي مصري وأحمل هوية مصري، أنا مش صيني ولا تركي ولا لبناني ولا إسرائيلي والله.

- وحدوا الله وماتحسسوناش ان احنا بيئة ولا زبالة إحنا غير كدة خالص، انتم شايفينا كدة عشان عايزين تشوفونا كدة.

يذكر أن هاني شاكر، نقيب المهن الموسيقية، أقام مؤخرا مؤتمرا صحفيا لتوضيح قرار منع مطربي المهرجانات من الغناء وأعلن على عدم انتمائهم للنقابة.

وأعلنت نقابة المهن الموسيقية أسماء الممنوعين من الغناء وشملت حمو بيكا وحسن شاكوش وكزبرة وحنجرة ومصطفي زكريا الشهير بمسلم وأبو ليلة وأحمد قاسم الشهير بـ"فيلو" وأحمد موزة وحمو طيخة وريشا كوستا وسمارة وشواحة وولاد سليم والعصابة والزعيم وعلاء فيفتى وفرقة الكعب العالى ومجدى شطة ووزة وشكل وعمرو حاحا.

لا يفوتك: عادل إمام تسبب في حرمانها من الزواج!! و"قبلة" أنهت حياتها مع حسن يوسف ... محطات من حياة لبلبة