صورة- متعرفش أبويا مين!... علي الطيب يطالب بالقبض على طفل سيارات جديد

ولاء مطاوع | فى حياة المشاهير

علي الطيب

الثلاثاء , 15 ديسمبر 2020 - 20:33 | اخر تحديث: الثلاثاء , 15 ديسمبر 2020 - 20:40

طالب الفنان علي الطيب بالقبض على طفل يبلغ حوالي 12 عامًا بسبب قيادته المتهورة للسيارة.

ونشر علي الطيب صورة السيارة عبر صفحته الرسمية على Facebook وكتب راويًا ما حدث: "اللي يشوف العربية دي راكبها عيل ١٢ سنة يبلغ عنه ويعمله محضر عشان البيه ماشي في شارع بيتي يا دوب عربية تعدي منه ومليان أطفال سواء راجعين من المدرسة أو ولاد حد في الشارع ونازل اجيب بنتي من المدرسة وشوفته بيجرى ولا كأنه في صلاح سالم قولت يمكن في حاجة طلعت اكتشفت أن البيه رايح جاي في الشارع ونزلت على صوت واحدة بتصوت كانت بنتها هتتخبط.. روحت نازل مستنيه يرجع تاني لغاية ما وقفته قبل ما يبدأ اللفة السادسة.. فين يا ابني أنت أهلك".

تابع: "الرد كان أنت مالك عايز إيه.. كان رد فعلي أني أفتح باب عربيته وـنزله منها لغاية ما حد ييجي من أهله يتصرف معاه فبدأ يهلل وأنت متعرفش أنا أبويا مين واخواتي مين.. روحت مخلي حد ركن العربية.. أخدت المفتاح وخليت جيرانه يكلموا أبوه.. أستاذ عماد اللي مفروض أنه في وزارة التربية والتعليم وفهمته أني في انتظاره والمفتاح معايا اسلمه ليه في ايده و قولت أكيد هيستوعب الكارثة و البيه لما لقى كل اللي يعرف أبوه كلمه راح مسخن ابوه و قاله انا اتضربت واتاخد مني مفتاح العربية وفجأة جه ووصل وكلامه كله يتلخص في أنت مالك وابني براحته و بدال عيالك او اللي في الشارع محصلهمش حاجه يبقى لزمته ايه كل ده و انت تضربه و تاخد ليه المفتاح
أنا حضرتك شديته بره العربية ومضربتوش لغاية ما حضرتك تيجي وتتصرف معاه".

أضاف الطيب: "هو أنا مش ممكن دلوقتي أمد ايدي عليك واندمك.. حضرتك راجل كبير ولو زودتها عن كده مش هعمل حساب لسنك
واللي كانوا معاه يسكتوني ومعلش حط نفسك مكانه و بعدين ابنه ظابط أمن وطني ومتدخلش نفسك معاه في مشاكل أنا هنا مبقتش مستغرب تصرفات ابنه أصلا وعرفت أن أبوه مقويه ولولا أني على حق وكل اللي واقف وشاف بيشهدوا على اللي حصل بس مقلقين منه ومن شره كان زمانه عملي محضر تعدي وسرقة مثلا.. عرفتوا ليه في عيال مستهترة ومكملة ومش فارق معاها جيرانها ولا الناس اللي حواليها تتأذي أو عيالهم تموت بسبب أب قرر يقول لابنه اللي لسه مبلغش ومش مسئول أنت براحتك ويدافع عن قرفه واستهتاره وعلى فكرة أي حارس عقار في الشارع كان مقلق منه ومستغربين وكل اللي على لسانهم أنهم بيتقوا شره".

اختتم علي الطيب: "وبعد ما سكته أني مش هستنى ده يحصل وربنا يسترها ونعيش في أمان ونحترم بعض ولا اعتذر رغم أني اعتذرت له عن أخد المفتاح بس كنت بلحق كارثة قبل ما تحصل.. وكل اللي على لسانه أنت متعرفش أنا كنت ممكن أعمل معاك إيه.. وأنا بقول لحضرتك قدام كل الناس آخرك هاته وأنا مبتهددش حد مسئول في الدولة يفهمنا في إيه بالظبط"؟

من ناحية أخرى كانت حادثة طفل المرور والتي كانت مشابهة لهذه الواقعة قد أغلقت قبل فترة قصيرة، حيث قررت "النيابة العامة" في ضوء أحكام المادة ١١٩ من قانون الطفل والتي ألزمت بعدم الحبس الاحتياطيّ للطفل الذي لم يجاوز خمس عشرة سنة، وفي ضوء ما أوصى به الإخصائي الاجتماعي من تسليم الطفل المتهم إلى ولي أمره مع أخذ التعهد بالمحافظة عليه وحسن رعايته وإخضاعه للتأهيل وجلسات تعديل السلوك.

يشار إلى أن على الطيب، شارك في رمضان 2020 بمسلسل "ونسني"، من بطولة أحمد سلطان، وحازم إيهاب، ومحمود الليثي، وسارة درزاوي، وبسنت شوقي، وهنا غنيم، وعبير منير، وأسامة عبد الله، مع ظهور خاص للفنانة حنان سليمان، والفنان سامي مغاوري، وهو من إنتاج حسن عسيري، وسيناريو وحوار تامر فرج، وإخراج رامي رزق الله.

اقرأ أيضًا:

بعد انتشار فيديو ساخر من تصرفها... زوجة أحمد الفيشاوي ترد: أنا أتقل من كده

عمرو دياب يطرح برومو "محسود" ثاني أغنيات ألبومه الجديد "يا أنا يا لأ"