ريهام سعيد ترد على انتقادات حلقة صيد الثعالب: مش كل مرة اتظلم كدة... فيديو

مي جودة | فى حياة المشاهير

ريهام سعيد

3 ديسمبر 2020 | اخر تحديث: الخميس , 3 ديسمبر 2020 - 17:12

في بث مباشر عبر صفحتها الرسمية بموقع Facebook، ردت الإعلامية ريهام سعيد على الانتقادات الموجهة لها بسبب حلقة الأربعاء الثاني من ديمسبر عن صيد الثعالب.

قالت ريهام في الفيديو: "في ناس يخصها ريهام سعيد بس، وفي ناس يهمها الثعلب بس، ومش كل مرة اتظلم كدة، وفي ناس ضدي وأعداء، وناس مضايقين إني طلعت بالبرنامج تاني، منهم ممثلات وراقصات".

وتابعت: "يعني مش معقولة الساعة 4 ونص الصبح، تطلع هاشتاجات ضد ريهام سعيد، امتى الحلقة لحقت اتشافت واتعرضت علشان يطلع الحاجات دي، والبرنامج ده هادف، وطول عمره شريف، وحتى الحلقة دي مهمة جدا، على الأقل لو هتبقى السبب في تغيير الطريقة بتاعت الصيادين في صيد الحيوانات، يبقى أنا عملت خير في كل الحيوانات".

وأضافت: "فكرة إني طريقة الصيد معجبتكوش ولا عجبتني أنا كمان، ومكنتش موافقة عليها، بس أنا معرفش ايه هي الطريقة الصح، وطبعا حقكم، لكن متبقاش ريهام عملت حلقة علشان تعذب الحيوانات وتكسب مشاهدة، وأنتم تعلموا إن أول حلقتين، مكانوش يستدعوا إننا نعمل حاجة علشان نكسب مشاهدة، ومشاهدتنا كانت عالية جدا".

واستكملت: "في ناس طبعا مضايقة إن الثعلب بيتم صيده بالطريقة دي، وإنها حاجة مفيهاش رحمة، بس أنا مبسوطة إن البرنامج سلط الضوء على إن الصيادين دول بيصطادوا بطريقة مش فيها رحمة، بس أنا مبسوطة بالرغم من العواقب، إن البرنامج سلط الضوء، على قضية الإعلام لم يتطرق لها من قبل، والبرنامج مسجل، يعني كنت ممكن أمنتج اللقطات بتاعت الثعلب ويطلع في الآخر بس، ولكن أنا معملتش كده علشان طول عمر البرنامج ده حقيقة، وبقدم الحاجة زي ما هي بحلوها وبمرها".

وتابعت: "أنا مالي الصيادين هما اللي بيصطادوا بالطريقة دي، بتهاجموني أنا ليه، مش أنا اللي اخترعت الطريقة ولا قولت للصيادين يصطادوا كده، أنا طلعت قولت الحقيقة، هو ليه الصدق بيضايقكم، رجاء من جمهوري متعملوش نفس الغلطة كل مرة".

كانت ريهام سعيد تعرضت لحملة انتقادات واسعة من المجموعات المهتمة بحقوق الحيوان عبر موقع Facebook، وصلت لحد المطالبة بمقاطعة برنامج "صبايا الخير" عبر شاشة "النهار" بسبب إمساكها وفريق عمل البرنامج بثعلب صحراوي حي، وأصدرت قناة النهار بيانا للاعتذار عن عرض هذه الحلقة موضحة أنه تم حذفها من كل المنصات.

قناة "النهار" تعتذر عن صيد الثعلب في برنامج "صبايا الخير" لريهام سعيد
يذكر أن ريهام سعيد عادت في الظهور عبر شاشة قناة النهار، في حلقة جديدة من برنامج "صبايا الخير" في تمام الساعة التاسعة والنصف مساء الاثنين 30 نوفمبر ، وكتبت موضحة عبر حسابها على Instagram: "بسم الله توكلت علي الله، استنوني النهارده و كل اتنين و التلات و الأربع علي شاشة النهار الساعة ٩،٣٠ بإذن الله".

يذكر أن ريهام سعيد كانت قد توقفت عن تقديم برنامج "صبايا الخير" في أغسطس 2019 بعد صدور قرار من المجلس الأعلى لتنظيم الإعلام بمنغ ظهورها في جميغ وسائل الإعلام المرئية والمسموعة بسبب تصريحاتها المسيئة عن أصحاب الوزن الزائد.