المذيع عمرو صلاح يعلن تعافيه من فيروس كورونا ويروي تجربة شهر مع المرض

مي فهمي | فى حياة المشاهير

عمرو صلاح

الخميس , 18 يونيو 2020 - 21:06

أعلن مذيع الراديو عمرو صلاح عن تعافيه من فيروس كورونا المستجد الذي أصيب به منذ شهر تقريبا.

وروى عمرو صلاح عبر حسابه الرسمي على Facebook تجربته مع المرض الذي صاحبه لمدة شهر.

وكتب عمرو صلاح:"الحمد لله تم القضاء على فيروس كورونا، النهاردة بعد الأشعة و التحاليل الحمد لله أتأكدت أنى خلصت من الضيف الرخم 🤧 اللى جه و خد راحته عندي شويه عندى 🤒 عدت على خير الحمد لله يارب.. شكرا لكل واحد أهتم و سأل.. شكرا لكل واحد قدم لى دعم ولو بكلمه و الكلمه أهم حاجه فى الوقت ده، شكرا لكل صديق حقيقي بان معدنه فى الفترة دي...شكر كبير جدا لوزير الإعلام (أسامه هيكل) على اتصاله و إنه يطمن على كل الأعلاميين... وربنا إن شاء الله يقومه بالسلامه قريب...
كل الشكر للدكتورة الشاطرة إللي بجد ربنا يكتبلها كل حاجه حلوة دكتور رحاب .. إللي كانت متابعه حالتى فى المستشفى لغاية النهاردة من غير ملل و لا تعب... ربنا يحفظك يا دكتور خلاصة شهر كورونا :١- و أنت بتكتب بوست مليان طاقة سلبيه و ندب.. خد بالك إن ناس كتير عندها كورونا بتقراه فالحاله النفسيه عندهم مش ناقصه (الحالة النفسية مهمه بنسبة ٥٠ ٪ فى العلاج).
٢- أقسم بالله أكتر ناس تعبت و بتتعب و هتتعب دلوقتي
الدكاترة و التمريض و عمال النضاف فى المستشفيات (على قد ما تقدروا أدعموهم ولو نفسيا)
٣- صحاب المدرسه مهما عدى الوقت هيفضلوا صحاب معدنهم أصيل.
٤- فى الأزمه دى لو لا قدر الله دخلت مستشفى هتطلع بصحاب حقيقيين منها لأن حالتكم كانت وآحده و كنتم داعمين نفسيا جدا لبعض و عديتوا الأزمه مع بعض
٥- متصدقش الأخبار المحبطه إللي ماليه الفيس بوك.. صدق إللي تشوفه بعنيك... أقسم بالله الفيس بوك و غيرة ما هو إلا خدعه.
٦-لو حسيت بأى وجع بسيط أستشير دكتور حل الموضوع في أوله أسهل ما بتسيبه بيكبر.
٧. متخفش كورونا مش بعبع أوى كده زى ما الناس خايفه و الدليل حالات الشفاء العاليه.
٨- إللي بيسأل الشباب بتموت منه .. فهقولك أنى سألت الدكتورة و قالتلي أن نسب التعرض لكمية الفيروس هى إللي بتفرق فى الشفاء... علشان كده الكمامات حتى لو خالطت حد بتقل من الرزاز.. فالو لا قدر الله حتى خدت الفيرس فهيكون بنسبه قليلة.. ف هيجيلك بأعراض خفيفه و يعدى.
٩- و أخيراااا.... من ساعة ما بنتولد ربنا كاتب لكل واحد هيعيش اد إيه في الدنيا بالثانيه... فا كورونا أو غيره ما هو إلا سبب لانتهاء وقتك فى الأرض.. متخفووووش و هتعدي قريب إن شاء الله.