خاص فؤاد المهندس والنجوم.. كيف تحصل على لقب "الأستاذ" بجدارة؟

إيمان مندور | فى حياة المشاهير

فؤاد المهندس

الجمعة , 6 سبتمبر 2019 - 04:09 | اخر تحديث: الجمعة , 6 سبتمبر 2019 - 11:09

"أكثر من نصف قرن من الضحك. مش وبس! لاااا ده نصف قرن من الضحك الجيد ذو معنى اللي له أبعاد، لأن المسرح بالنسبة لي هو الحياة، هو حياة فؤاد المهندس، يعني أنا ماكلش ماشربش ماتفسحش منامش معملش أي حاجة إنما المسرح مســــــــرح، هو حياتي. لو تقطعوا من جسمي كده هتلاقوا كل سنتيمتر مني بيقول مسرح".

هكذا لخص الفنان الكبير الراحل فؤاد المهندس قصة حياته ومسيرته الفنية في هذه العبارة، لكنه في الحقيقة أجاد أيضًا في السينما والراديو والتليفزيون؛ أجاد في كل ما قدمه وليس المسرح فقط، فمن منّا لا يتذكر عمو فؤاد، ومستر إكس، وشنبو مصطفى شنبو، والمهندس سبعاوي، والدكتور رأفت، والأستاذ أبو الفضل، وياقوت عبد المتجلي ومسعود أبو السعد...وغيرهم، فهو كل هؤلاء وأكثر.

ورغم ذلك، كان انتباه تلاميذه وكل من تعاملوا معه من الزملاء الفنانين ينصب في اتجاه أهم وأوضح بالنسبة لهم، ألا وهو كونه أستاذًا ومربيًا ومعلمًا ومساعدًا لهم في اكتشاف وتطوير مواهبهم. أي أن قيمة وأهمية "الأستاذ" صنعت محبة تضاهي وهج النجومية.. بل وتزيد عليها.

أكثر من نصف قرن خرّج فيه فؤاد المهندس أجيالا من النجوم التي تليه، منحهم الفرص الحقيقية في مدرسته ولم ينسوا فضله عليهم، بدءًا من عادل إمام وصلاح السعدني وحسن مصطفى مرورًا بشيريهان ومحمود الجندي وسناء يونس وأحمد راتب ومحمد أبو الحسن وغيرهم الكثير.

ولأن أفضل القصص هي التي نسمعها من أصحابها مباشرة دون زيادة أو نقصان، نسرد فيما يلي نصًا ما قاله بعض الفنانين عن القدير فؤاد المهندس، وكيف كانت تجاربهم الفنية معه، والتي ندرك من خلالها يقينًا أن كثيرين يصلون للنجومية لكن نادرًا ما نجد "أستاذًا" مثل فؤاد المهندس..

عادل إمام

أول نجم يبقا صديقي.. وأول حد اداني فرصة في مسرحية (أنا وهو وهي).. لما تقعد معاه لا تتمالك نفسك من الضحك.. هذا الرجل العظيم الملئ بالإنسانية يشجيك ضحكًا .. أنا دلوقت لو استاذ فؤاد قالي تعالى يا عادل اشتغل معايا أي دور مهما كان حجمه هوافق فورًا واشتغل معاه.

فاروق فلوكس

الأستاذ فؤاد كان لديه ملكات كثيرة جدًا، ولديه قدرة رهيبة تجذب الأخرين وحب وشياكة ويربي ويعلم، هو اللي اكتشف جيلنا كله، حرفيا جيلنا كله خارج من جيبه. يوم وفاته عادل أمام لقاني بعيط جامد جدا، فبصلي وقالي: (ده أول فنان دخلّنا بيته).

أحمد راتب

فؤاد المهندس رجل عظيم ذو قلب طفل .. كان عليه بصة عين منسهاش.. الله يرحمه، في سك على بناتك المشهد اللي أنا بتعصب عليه وبزعقله المفروض إنه قاعد حاطط ايده على خده وبيسمعني.. المشهد مكتوب فيه إيفيه واحد.. أنا قولته لقيته لسه ساند إيده ويقولي بصوت واطي ونظرته المعهودة: "لسه". فاقوم موقّع النضارة وعامل إيفيه فيقول: "لسه". فاعمل إيفيه تاني فيقول: "لسه".. فضل ورايا لحد ما عملت يجي 7 إيفيهات مش مكتوبة في المشهد وهو منتظرني أعمل أحسن ما عندي.

ده نوع نادر من الممثلين غير موجود في الدنيا خالص، كنت مجرد واد ممثل لسه طالع جديد وهو في المشهد يقعد في جنب وباصصلي وميتحركش عشان ميلفتش انتباه الجمهور ليه ويخليهم مركزين معايا وميشدهمش مني.. أنا شوفت أيام عز بشغلي معاه والله.

نجاح الموجي

معروف عن الأستاذ فؤاد إنه بيقف جنب الجيل اللي بعديه وبيشيلهم على كتافه ويطلعهم. لما كان يقف جنبهم تحس إنه أخ أكبر أو أب.. يفرشلهم عشان يقولوا الإيفيهات.. بعكس فنانين آخرين بيقفلوا على الممثلين الأصغر منهم.

محسن محيي الدين

فؤاد المهندس أستاذ وتعلمت منه الكثير، تعلمت منه أنه لا ينجح أي عمل دون أن يعطي القائد لكل شخص مساحته، كي لا يبني القائد نفسه على أنقاض الأخرين، أستاذ فؤاد كان بيدي كل واحد مساحته ويسعد إن اللي قدامه عليِ أكتر.. ده نمط قليل تلاقيه، هو فعلا أستاذ حقيقي، لأن بعض الفنانين الكبار مبيحبش اللي حواليه يظهروا عشان يفضل هو ظاهر وخاطف الأضواء، لكن أستاذ فؤاد بيخلي كل اللي حواليه يظهروا وبيبقا سعيد جدًا.

بهجت قمر

أحببت شخصية فؤاد المهندس للغاية لأنني وجدته فنان شامل، حسيت إن الراجل ده محتضن الجميع بيحب كل الناس وبيديهم من قلبه وإحساسه ويخاف عليهم ويحاول يديهم خبرته ويبذل من موهبته في سبيل إبراز مواهبهم.

حسن مصطفى

كان صديق وأستاذ أكبر قامة وهامة، محترم وكان يحب الناس مش أناني ويحب يساعد الغير، كان يساعد الفنانين الأخرين لما يشتغلوا معاه إن مساحتهم تكبر وياخدوا حقهم في العمل.. مش شايفه له نظير أو في حد زيه وفاءً وفنًا وعلاقة وأشياء كثيرة جدا. متحسش معاه إنك متضايق أو غريب أو ناقصك شيء. كان جميل وراجل يحب عمله ويحب الأشخاص اللي تتعاون معاه في العمل.

عبد المنعم مدبولي

فؤاد فنان صاحب مدرسة، له أسلوب خاص متميز عن بقية الفنانين. متعدد المواهب. فنان شامل لأنه يقدر يؤدي كل شيء. بيعرف يمثل كل الألوان. والأهم إنه فيه ميزة مش موجودة في زملاء كثيرين إنه يستطيع إنه يضحّك بكلام مبيضحّكش. فؤاد المهندس ممثل كامل 100%.

سناء يونس

بكون سعيدة جدا بالعمل مع أستاذ فؤاد المهندس، وأنا مدينة له بنجاحي إذا كنت نجحت يعني . علمني الالتزام والانضباط . هو مثال للاحترام أنا بحس وأنا بشتغل معاه إن أنا بنوَّر، ملكة متوجة، حقيقي بندم على السنين اللي فاتت لأني مشتغلتش فيها معاه.

عادل أدهم

بدايتي كانت مع الأستاذ فؤاد المهندس. إنسان كله حب ونَفَسه طويل وبيحب شغله أوي. بيعبد شغله. معطاء للجميع، يحب اللي حواليه من العمال للزملاء.. دايما روحه فياضة بالحب. هو زميل عزيز وأستاذ كبير وقلب كبير، له أسلوبه ويبتسم كأي واحد من الجمهور وإحنا بنشتغل. أذكر كنا نضحك وإحنا بنشتغل مع بعض لما واحد فينا يقول إيفيه حلو وجديد ونبقا هنبوظ المسرحية بضحكنا.

عمر الحريري

فؤاد فنان تاريخ.. مهواش ابن يوم ولا ابن لحظة.. فؤاد ابن كفاح طويل وعرق وسهر ليالي، مش في الفسح، لااا سهر في الشغل وفي الكتابة والكلمة اللي هقولها. هو فنان بكل خلجة من خلجات جسمه وكل حركة فيه.

اقرأ أيضا:

فيديو نادر- رأي فؤاد المهندس في عادل إمام.. الزعيم يتأثر

بالفيديو- شاهد ماذا قالت ابنة شويكار عن زوج والدتها فؤاد المهندس.. تتذكر هذا الموقف