أمير طعيمة يدافع عن نفسه ويوجه رسالة لمحمد رمضان

نهال ناصر | فى حياة المشاهير

أمير طعيمة ومحمد رمضان

الثلاثاء , 13 أغسطس 2019 - 00:08 | اخر تحديث: الثلاثاء , 13 أغسطس 2019 - 00:08

بعدما تم الإعلان عن تعاون المؤلف والشاعر الغنائي أمير طعيمة مع الفنان محمد رمضان، بدأ البعض يوجه اتهامات وانتقادات لطعيمة.

بالفيديو- أمير طعيمة يكشف سبب خلافه مع محمد رمضان

سبب ذلك هو أن طعيمة سبق وانتقد رمضان، بل وطالب بعض من زملائه عدم التعاون معه، لأنه دائما يصف نفسه أنه رقم واحد.

وفي منشور طويل أوضح أمير طعيمة وجهة نظره، مؤكدا أنه هاجم رمضان بسبب تصرف ما، لكنه لم يهاجمه كشخص، مضيفا أنه جلس وتحدث معه ووجد أن لديه عزم وإرادة أن يحقق نجاحات، وهما بصدد تعاون في عمل جديد.

وقال في المنشور الذي كتبه عبر صفحته علىFacebook: "البوست ده للحبايب واللي يهمهم أمري، ‎من أكتر من سنة كتبت بوست عن الفنان محمد رمضان وانتقدت تصرف معين عمله كان من وجهة نظري تصرف خاطيء وأنا عادة بعلق علي الأحداث اللي بتحصل، البوست مكانش شخصي لأني مكنتش قابلت محمد ولا حتي صدفة وما شفتش منه أي حاجة مسيئة لشخصي وكلامي كان عام و علي موقف محدد.

أضاف: "‎بعد البوست ده اتعرض عليا عشرات اللقاءات التلفزيونية ومعظمها مدفوعة الأجر عشان طبعا الموضوع كان تريند وأنا رفضت التعليق و لا حتي صحفيا وردي كان دايما: الهدف مش شخصي وأنا مش مفضي حياتي لتتبع شخص بعينه".

‎"دعوتي لمقاطعة زملاء محمد للعمل معه في البوست كانت بناء عن تحليلي أن تصرفه يحمل اهانة لزملائه وهو رد بعد كده في أكتر من لقاء وحوار بكلام يحمل كل الاحترام لزملائه، وأحد أقوي منافسينه و منهم أخويا وصديقي أمير كرارة استضافه في برنامجه، وتصريحات كتير لمحمد كانت إيجابية جدا".

وأكمل: "‎المرة الوحيدة اللي جت سيرة محمد رمضان في بوست عندي كان للدفاع عنه بعد ما بشرى عملت أغنية وقلت بالحرف أن أغانيه دمها خفيف ولايقة عليه وأن أغنيتها غير موفقة، رغم أني أعرف بشرى وما أعرفش محمد بس كالعادة آرائي بفضلها عن الشخصنة، والمرة التانية لما أتقال اني اعتذرت عن كتابة أغاني الجزء الثاني من الكنز و نفيت الخبر جملة و تفصيلا و قلت نفس الكلام: الموضوع مش شخصي و ده عمل فني مهم و راقي بالنسبالي و وجود محمد في الفيلم اضافة لموهبته و جماهيريته الكبيرة ده غير ان تعاقدي اصلا مع استاذ شريف عرفة اللي بتشرف بالتعامل معاه.

تابع: "‎المخرج ياسر سامي الصديق المشترك بنا اقترح أني أنا ومحمد نتقابل والطرفين رحبوا لأن فعلا مفيش حاجة بنا، وتصادف يكون اللقاء ده يوم في أيام مفترجة يوم وقفة العيد وفي لقائنا احترمت جدا كلامه عن البوست سبب الأزمة وأنه متفهم و عارف أنها نصيحة وأنه جايز لو مكاني يكتب نفس الكلام ده، الراجل حتي ما لامنيش رغم المفترض أن ده كان يحصل وكنت هتفهم أنا كمان لو قاللي أنه زعلان.

‎الجلسة امتدت ساعات واتكلمنا في حاجات كتير وأنا حبيته جدا جدا وحسيت أنه شخص طيب ومتصالح مع نفسه والأهم حبيت إصراره علي النجاح ورغبته دايما في التطور وفي نهاية الجلسة اتفقنا يبقي فيه بنا تعامل فني بصفة عامة وبالذات أني اتجهت لكتابة السياريوهات في الفترة الأخيرة بالإضافة طبعا لشغلي الاساسي كشاعر غنائي.

‎البعض انتقد العمل اللي لسه مطلعش للنور ولا عارفين هو أغنية ولا فيلم ولا تتر من قبل حتي ما نشتغل فيه، بتنتقد عمل ممكن يكون حاجة معمولة بجهد ومستواها عالي فنيا وإضافة للطرفين قبل حتي ظهورها للنور ؟!!!!!

‎أما بتوع الفلوس واللي الفلوس مجنناهم، حضرتك أنا في ٢٠١٩ فقط مقدم حتي الآن ما يقرب من ٧٠ أغنية و لسه أعمال هتنزل خلال ال ٣ شهور القادمين وده هيبقي رقم قياسي ليا أنا شخصيا في عام واحد وخاصة أنها بفضل الله أعمال مهمة و محترمة .. ده ردي علي أن تعاملي الفني مع محمد هعمله عشان الفلوس".

واختتم أمير طعيمة كلامه موجها رسالة لمحمد رمضان وطلب منه ألا يكون منزعجا منه بسبب منشوره السابق لأن أسلوبه فيه كان حادا، مؤكدا له أنه شخص طيب ومتواضع، "ما تزعلش من أسلوبي في البوست تاني لأنه فعلا كان حاد زيادة عن اللزوم، انت شخص طيب ومحترم ومتواضع وعندك أحلام كبيرة وعايز تقدم حاجات أحلى وأحلي وإن شاء الله تحقق ده معايا ومع غيري لأنك موهبة كبيرة و مجتهد و لكل مجتهد نصيب".

يشار إلى أن محمد رمضان طرح آخر أغنياته المصورة بعنوان "انساي"، التي جمعته مع المطرب المغربي سعد لمجرد، والتي تم تصويرها بطريقة الفيديو كليب في باريس خلال الأسابيع الماضية، وهي من كلمات وألحان سعد لمجرد، ويغني سعد باللهجة المغربية، فيما يغني رمضان باللهجة المصرية، والكليب من إخراج حسام الحسيني.

اقرأ أيضًا:
‏

محمد رمضان يعلن موعد حفله الغنائي الجديد

بعد الإعلان عن حفله في الساحل.."المهن الموسيقية" تنظر شكوى منع محمد رمضان من إحياء حفلات