اشتباك وتراشق بالألفاظ بين عمرو أديب وخالد صلاح على الهواء

فى حياة المشاهير

الأربعاء , 25 نوفمبر 2015 - 12:46

بسبب مقالا نشره الصحفي خالد صلاح بصحيفة "اليوم السابع" ينتقد التقصير الأمني في حادث تفجير فندق العريش، بدأت حرب كلامية بينه وبين الإعلامي عمرو أديب.

في مداخلة هاتفية بين أديب وصلاح ببرنامج "القاهرة اليوم"، بدأ مقدم البرنامج انفعاله قائلا: "اللي ميشوفش يبقى أعمى القلب مش العنين، أنت مبتشوفش يا خالد؟ حرام عليك يا راجل، يا أخي نخلي عندنا دم، البلد مش مستحملة خالص، ماتكبروا بقى يا جماعة، البلد مش مستحملة، هو في أكتر من كده، نعمل إيه يا أخي، حتى الموقع بتاعك معندهمش مسئوولية وحطين لك صورة وإنت بتضحك، فين المهنية، بلاش حتى يا أخي في يومها تهاجم".

فرد صلاح: "إنت مش واخد البرنامج لحسابك وأنا من حقي أرد ومتزايدش عليا في الوطنية، لازم نواجه أخطاءنا، ولو كل واحد فينا مسك للتاني مش هنخلص، وفرنسا تم انتقاد الأمن فيها بعد واقعة هجمات باريس، أنا من حقي أرد قانونيا ومهنينا، والمفروض الاحتياطات الأمنية تكون أقوى من كده".

فاستكمل أديب: "أنت بتفهم حاجة في المهنية"، ليرد عليه صلاح: "لا كده مش هقبل كلامك وهفهمك غلط، ومفروض التدابير الأمنية كانت تبقى أكتر من كده على الفندق اللي حدث فيه التفجير".

واستطرد أديب بانفعال: "مش عارف أنت أزاي رئيس تحرير ، ياعم روح شوف موقعك بقى عامل إزاي"، ورد خالد صلاح: "ده تجاوز وخروج على الأدب وغير مقبول"، ليعقب عليه أديب: "قلة أدب تقبلها ولا متقبلهاش بلا قرف، تعبنا منكم البلد مش ناقصة ومتخلناش نتكلم عن علاقتك بخيرت الشاطر"