الناقد والمؤرخ الموسيقي محمود فوزي يحكي قصة اغنية لنادر نور رفضها الجميع وأصبحت علامة في مشوار فضل شاكر

فى موسيقى وحفلات

الأحد , 31 مايو 2026 - 21:05 | اخر تحديث: الاثنين , 1 يونيو 2026 - 13:06

روى المؤرخ الموسيقي محمود فوزي قصة لحن أغنية "لو على قلبي" التي غناها النجم فضل شاكر في بداية الألفينيات.

قال محمود فوزي: "سنة 2004، جاء فضل شاكر مصر لاخيتار أغاني ألبومه الجديد، وكان عنده معاد مع الملحن نادر نور، وراح نادر قعد مع فضل وسمعه مجموعة كبيرة من الأغاني معجبتوش ولا أغنية منهم، وقال له: (أنا عايز حاجة إيقاعها مش سريع، عايز أغنية رايقة)، فنادر نور افتكر أغنية (لو على قلبي) كان حضرها هو والشاعر ربيع السيوفي مع بعض".

وأضاف محمود فوزي: الأغنية دي قعدت 4 سنين، مش راضية تتباع، سمعها لمطربين كتير جدا مش عاجباهم، اللي حاسس إن هي مش ستايله، أو أنها أقوى من صوته شوية، وقرر نادر يسمعها لفضل، وأول ما مسك الجيتار وسمعها له، فوجئ إن فضل بيجيب الكاسيت ويسجل عليه الأغاني، وحطه وقال لنادر غني الأغنية كاملة، وقال له إن خلاص هياخدها، بس نادر محطش أمل أوي لأنه حاسس إن الأغنية مش جامدة أوي وهتكسر الدنيا.

واستكمل محمود فوزي: فوجئ نادر نور بالشركة بتتصل بيه وبتقول له عايزين التنازلات بتاعت الأغنية، واتصورت فعلا في 2004 عشان تبقى واحدة من العلامات في حياة فضل شاكر.