محمد سامي يتحدث عن بداية تغييره في الدراما العربية ونقطة الانطلاق من مسلسل "آدم"

فى سينما وتلفزيون

الاثنين , 9 ديسمبر 2024 - 16:01 | اخر تحديث: الثلاثاء , 10 ديسمبر 2024 - 09:49

حكى المخرج محمد سامي كواليس دخوله لعالم الدراما التليفزيونية بعد سنوات أخرج فيها العديد من الفيديو كليبات.

وحكى محمد سامي في جلسة حوارية ضمن فعاليات الدورة الرابعة من مهرجان البحر الأحمر السينمائي، بعنوان "محمد سامي ... مجدد الدراما العربية" كيف تحول من مخرج فيديو كليب إلى مخرج دراما تليفزيونية وما واجهه في بداية المشوار.

وقال محمد سامي: "لما حصلي عرض إني أعمل مسلسل "آدم" كنت في الوقت دا مخرج كليبات مكنتش لسه أخرجت سينما أو تليفزيون، كنت بحضر لفيلمي الأول، وتامر حسني عرض عليا مسلسل آدم وكانت المسلسلات في الوقت دا بتتعمل بطريقة أقدم من اللي بنشتغل بيها دلوقتي، كان في دراما عظيمة طبعا ولكن كان في الوقت دا شكل التصوير كلاسيكي وكاميرات قديمة".

وتابع محمد سامي: "في سنة 2005 نزل مسلسل prison break وفي 2008 نزل مسلسل breaking bad وكنت متأثر بيهم جدا وفي سنة 2007 نزلت كاميرات ديجيتال جديدة، اقترحت أن ليه منصوروش بالشكل الجديد والمنتج مكنش مرحب بالفكرة ومعجبوش وقالي الدراما التليفزيونية عايزة شكل كلاسيكي عشان منخرجهاش برا إطارها فالناس تقفل منها ومتتفرجش عليها، ساعات بعض الأشخاص في الوقت دا شايفين أنهم بيتكلموا صح لكن الكلام دا أنا مكنتش موافق عليه وشايف أنه غلط مع كامل احترامي للمنتج اللي قال دا، اقنعت تامر حسني".