لبلبة في حوار لـ"القاهرة السينمائي": الجمهور بيعاملني كطفلة ودور "الميتة" الأصعب في مشواري الفني

فى سينما وتلفزيون

السبت , 19 نوفمبر 2022 - 11:11 | اخر تحديث: السبت , 19 نوفمبر 2022 - 16:11

خلال الدورة الـ44 من مهرجان القاهرة السينمائي الدولي، تم تكريم الفنانة لبلبة بجائزة إنجاز العمر.

ونشرت قناة مهرجان القاهرة السينمائي عبر YouTube لقاء خاص مع الفنانة لبلبة حكت فيه عن شعورها بعد التكريم وبداياتها الفنية وكشفت عن أكثر عمل أثر فيها نفسيا.

في البداية تحدثت لبلبة عن التكريم في المهرجان وقالت: تقدير لمشواري الفني الطويل، أنا مش فاكرة أول مرة مثلت فيها ولا أول مرة طلعت للجمهور أو المخرج كان بيوجهني إزاي كان عندي 5 سنين كل اللي فاكراه لما حسيت بنفسي وأن في كاميرا ومخرج بيوجهني، وفي مسئولية شغل.

وتابعت: أنا حبيت الفن وعشقته مش علشان الناس بتحييني لكن لأني دوقت طعم النجاح، ولما أستاذ حسين فهمي قالي أنهم هيكرومني في مهرجان السينما لقيت شريط سينما طويل كل حياتي قدام عيني، شيء رائع أني بتكرم من مهرجان القاهرة مهرجان بلدي مهرجان عريق، مفيش أحلى من كده.

وأوضحت لبلبة أنها لم تندم على تفضيلها للفن على حياتها الخاصة وقالت: الفن أداني حب الجمهور أنا عايشه في وجدان الناس من طفولتي، الجمهور دا شافني في كل مراحل عمري رباني وكبرت قدام عينه، الجمهور بيعاملني لسه كطفلة لأنه أتعود عليا أني طفلة، وعمري ما في حياتي ندمت أني ضيعت حاجة، حب الجمهور ليا من غير غرض وأتمنى أفضل عند حسن ظن الجمهور وربنا يديني الصحة وطولة العمر وأقدم أعمال يبقى الجمهور راضي عنها.

وعن أكثر عمل أثر عليها نفسيا قالت لبلبة: في مسلسل "الشارع اللي ورانا" قدمت دور روح ، ماتت من سنين والدور أثر عليا نفسيا، وكنت لما أنام أحلم بكل الميتين في عيلتنا، كنت ساعات أمشي نفس المشية اللي بمشيها في المسلسل لأن اشتغلنا 7 أشهر وكل يوم أنا ميتة.