نصيحة إعلامي رياضي لمشاهد كرة متعصب ... إحنا كلنا بناخد فلوس وأنت لا

فى سينما وتلفزيون

الثلاثاء , 15 مارس 2022 - 13:03

وجه الإعلامي إبراهيم فايق نصيحة للمشاهدين، بضرورة التخلي عن سلوك التعصب للأندية.

تحدث إبراهيم فايق في مقدمة أحدى حلقات برنامج "جمهور التالتة" عبر قناة ONTime Sports قائلا: "أحنا عايزين يا جماعة الدنيا سهلة ونتبسط ونتسمتع بالكرة واللي وصلنا له في الكرة".

وتابع: "مش عايزين الناس أعصابها تتشد، أنا نفسي كل الناس تشجع وتنبسط من غير شدة أعصاب، والله العظيم ما مستاهلة اللي زعلان ومتضايق".

وأشار إبراهيم فايق إلى ضرورة تجنب التعصب في التشجيع موضحا: "بيصعب علي أن الناس تبقى متعصبة وتتخانق مع بعض عشان ماتشات للأهلي والزمالك".

وأردف: "سيدي المشاهد، عزيزي من جمهور الأهلي والزمالك والإسماعيلي والاتحاد والمصري وكل الأندية الجماهيرية، أنت الوحيد اللي مش بتاخد حاجة من أي حاجة، فمش معقول اللي تاخده شوية أمراض".

وأوضح فايق: "أنا باخد فلوس وكل اللي في الأستوديو بياخدوا فلوس، والحكام واللاعيبة والمنظومة كلها بتاخد فلوس، والناس بتعمل شغلها وتروح".

وأضاف: "أنت مابتاخدش حاجة، متعتك في الكرة، فأرجوك خليها بس في المتعة، ما توصلش الموضوع أنك تبقى تعبان عشان ماتش كرة. اتبسط بالماتش وأي حاجة سلبية بلاش تاخدها على أعصابك، مفيش أي نادي هينفعك لو لا قدر الله جرالك حاجة، مفيش حاجة هتنفعك".

وأكد فايق: "تخيل نفسك قدام ولادك وعيلتك وأصحابك عشان خاطر ماتش كرة، حب الكرة النادي حلو بس مش على أعصابك، نحاول ندردش ربما يوم ما نوصل للحقيقة الكاملة أن الكرة للمتعة فقط بدون أي تعصب أو تشنجات".

واختتم إبراهيم فايق قائلا: "أنا عارف أنني هقول الكلام ده وأدخل على فقرة التحكيم الناس تكسر التليفزيون".