كشف الموسيقار العالمي فتحي سلامة عن رأيه في موسيقى "التراب" المصري.
وخلال استضافته في برنامج "التاسعة" الذي يقدمه الإعلامي يوسف الحسيني عبر القناة الأولى المصرية قال: "المهرجانات فيها حاجة شرقي وشعبي، لكن (التراب) المصري ملوش دعوة بينا غير شوية في الإيقاع، المزيكا كلها مسروقة رسمي من حاجات برا، وفي بعضهم بيكتب ده."
وأوضح فتحي سلامة سبب تفكيره في التعاون مع المطربة الراحلة جمالات شيحة قائلا: "أنا من شبرا وطول عمري بروح الموالد وبحب موسيقى الأرض بتاعتنا، وده سر نجاحي برا. بروح أدي ورش في جامعات كبيرة جدا في أمريكا وأوروبا، طبعا مش هروح أعلمهم جاز، اللي حابين يتعلموه مني الموسيقى الشرقي بتاعتنا أو المصري وكيفية استعمالها في موسيقاهم."
وأضاف: "جمالات شيحة الله يرحمها صوت كبير جدا وقوي وأصلي، جاي من تراب البلد دي. سافرت معايا جولات كتير جدا في اليابان وأوروبا، هي مش بتعرف تقرا وتكتب، بس لما تطلع على المسرح الناس كانت بتعجب بيها أكتر منا."