مروان يونس: أغنيتي الجديدة عن نوع معين من البنات

فى سينما وتلفزيون

الثلاثاء , 2 نوفمبر 2021 - 20:36

حل الفنان مروان يونس ضيفا على برنامج "تريندز"، الذي تقدمه الإعلامية ريهام الشيخ عبر القناة الأولى المصرية، وكانت له هذه التصريحات عن دخوله مجال التمثيل، ومقاطع الفيديو التي اشتهر بها في مواقع التواصل، ونوعية الأغاني التي يقدمها، وأحدث أعماله فيلم "عروستي":

- أنا خلفيتي شغل الإعلانات، وأعرف مخرجين وممثلين كتير من زمان، ودخولي التمثيل كان بسبب شهرتي على السوشيال ميديا

- ظهرت في برنامج "أبلة فاهيتا" في كذا حلقة، وكانت أول فرصة كبيرة ليا في التليفزيون

- طلبت من كل حد أعرفه أمثل بشكل هستيري، وقلت لأحمد مراد عايز أمثل في "الفيل الأزرق 2" حتى لو أباجورة. كانت أول فرصة وفي الوقت ده قررت أمثل

- فيلم "عروستي" فيلم خفيف. كنا أسرة وشلة صيع، وفكرة إني أكتب في ورشة مع أمي كانت غريبة، وكانت أول مرة تمثل

- مصطفى البربري كاتب الفيلم ديمقراطي جدا، وطلب نساعد ونكتب

- أحمد حاتم شخص في منتهى الجمال ومتواضع جدا، واتصاحبت عليه بسبب شخصيته الجميلة

- في بداية شغل السوشيال ميديا كانت كل التعليقات إيجابية والناس مبسوطة، وبعد ما ظهرت في "أبلة فاهيتا" ودايرة الجمهور وسعت مش كل المواضيع كانت بتعجب كل الناس

- بقيت أحس إن السوشيال ميديا فيها سلبية وناس بتحب تشتم، وفي الأول كنت بقرا كل التعليقات وأتضايق جدا

- كنت بغني زمان وكان صوتي حلو جدا، ومع التدخين صوتي قلب تيل فرامل

- مبعتبرش نفسي مغني، أنا بعمل إسكتشات غنائية

- في أغنية "الفرافير" كنت عايز أعمل مهرجان شعبي للطبقة العالية، عن شخص معندوش مشاكل، وعملت أغنية "بكرهكو كلكو" عشان السلبية على السوشيال ميديا

- شغال حاليا على إسكتش عن نوع معين من البنات

- أكتر فنانين انبسطت في الشغل معاهم؟ أحمد حاتم رقم واحد دلوقت، وكريم عبد العزيز، وأمينة خليل وتايسون، وإياد نصار

- بسمع في العربية موسيقى إليكترونية، ومسحول مع دي جي روسي

- مش بتفرج على أعمالي، ومش بسمع راديو، مع إني كنت شغال في الراديو