يوسف عثمان: اتعلمت إيطالي عشان "ريتسا" ومش راضي عن كتير من أعمالي

فى سينما وتلفزيون

الثلاثاء , 2 نوفمبر 2021 - 19:34

حل الفنان يوسف عثمان ضيفا على برنامج "تريندز" الذي تقدمه الإعلامية ريهام الشيخ عبر القناة الأولى المصرية، وكانت له هذه التصريحات عن عودته للتمثيل بعد التوقف في فترة المراهقة، وقناة اليوتيوب الخاصة به، ومشاركته في فيلم "ريتسا" ومسلسل "وادي الجن":

- أنا بحب الكورة من زمان وقناة اليوتيوب هواية

- طريقتي في القناة كاجوال ومختلفة عن الأستوديوهات، ممكن أهزر في النص، والناس عجبتها الطريقة دي

- القناة سمحتلي أسافر كاس العالم في روسيا، وصورت ثقافات البلد وناس من كل حتة

- صورت لما كاس الأمم الأفريقية إتلعبت هنا سنة 2019، واحتكيت بثقافات أفريقية مختلفة

- بسبب شغلي في القناة إتعلمت التصوير والمونتاج وحاجات جديدة

- لما وقفت تمثيل فترة المراهقة والدراسة وبعدين رجعت أمثل الناس مكانتش عارفاني، وتعاملت كإني ببتدي من الأول

- عملت حاجات لما بدأت أمثل تاني مش راضي عنها، وبحب السينما أكتر من المسلسلات سواء كمتفرج أو ممثل

- "ريتسا" كان تجربة حلوة لإنه رابع فيلم أمثله مع أستاذ محمود حميدة، والأحلى إننا بنعمل نفس الدور

- كواليس الشغل مع محمود حميدة كانت حلوة، بديله هيبته لكن تقبل إني أهزر معاه زي واحد صاحبي، وإتعلمت إيطالي عشان الفيلم

- معظم شغلي في "ريتسا" كان مع عائشة بن أحمد، هي شاطرة جدا وإتعلمت الرقص أسرع مني، والفيلم المفروض يدخل مهرجانات الفترة الجاية

- حلاوة مسلسل "وادي الجن" إن نص المشاهد على كروما، ومع حاجات مش شايفينها، وإنه دور كوميدي، وارتجلت 60 أو 70 % من الدور