أحمد داود: متحمس أشوف نفسي 3D في "يوم 13"

فى سينما وتلفزيون

الثلاثاء , 26 أكتوبر 2021 - 20:10

حل الفنان أحمد داود ضيفا على برنامج "تريندز" المذاع عبر القناة الأولى المصرية، وتحدث عن فيلميه المقبلين "يوم 13" و"هيصة"، وتعامله مع السوشيال ميديا، وكانت له هذه التصريحات خلال اللقاء:

- "يوم 13" أول فيلم مصري 3D (ثلاثي الأبعاد) يتم تصويره بالكامل في مصر، وهو فيلم كبير أنا متفائل بيه

- الفيلم إنتاج شركة "أوسكار" وائل عبد الله، ولؤي عبد الله، وأول إخراج لوائل عبد الله، وسعيد إنه قدمني بالشكل ده

- الفيلم فيه كاست كبير، دينا الشربيني، شريف منير، نسرين أمين، محمد ثروت، وضيوف شرف فخور بوجودهم، جومانا مراد، أروى جودة، فيدرا، محمود عبد المغني، أحمد زاهر، ومجدي كامل

- لسه معرفش موعد عرض الفيلم، آخر كلام مع أستاذ وائل عبد الله ممكن أول السنة وممكن يستنى شوية

- التصوير 3D مفرقش معايا كممثل، ومتحمس أشوف نفسي 3D

- دوري في "هيصة" لاعيب كورة، أنا بلعب كورة وأهلاوي لكن مش متعصب

- الفيلم تأليف محمد ناير، وإخراج عثمان أبو لبن، وهو فيلم كورة ومزيكا في حتة شعبية

- أنا مش بعيد عن السوشيال ميديا، ومش قريب منها قوي، والتركيز كتير معاها غلط

- لما حد يبقى عنيف قوي على السوشيال ميديا أو يشتم دي حاجات تخض

- علاقة ولادي بالسوشيال ميديا؟ دوزي لسه صغير، جميلة بدأت وبنحاول نعمل كنترول لكن صعب، والسوشيال ميديا بقت جزء رخم من حياتنا

- بسمع راديو دايما في العربية، وكنت بستني إذاعة الأغاني الساعة 11 عشان أغنية أم كلثوم

- بسمع مهرجانات وبحبها لو الصوت حلو، ووقت "سجن النسا" سمعت 8 جيجا أغاني شعبي