بكاء جلا هشام وإصرار أحمد كشك..أبطال حكاية "بدون ضمان" يكشفون كواليس العمل

فى سينما وتلفزيون

الثلاثاء , 26 أكتوبر 2021 - 00:10

استضافت الإعلامية إنجي القاضي في حلقة اليوم من برنامج "مساء dmc" أبطال حكاية "بدون ضمان" من مسلسل "إلا أنا"، وتطرق اللقاء إلى طبيعة أدوارهم، ونلخص تصريحاتهم في هذا الجزء من اللقاء في النقاط التالية:

(هنادي مهنا عن دور "مريم")

- أشكر حنان سليمان لإنها كانت أمي في المسلسل، ولي الشرف إنها كانت أمي وأستاذ أحمد بدير بابايا

- شخصية "مريم" أقرب شخصية لقلبي، واكتشفت بعد المسلسل إن ناس كتير عندها مشكلة "مريم". هي حبت "شريف"، وبعد ما بقت مراته تصرفاته اختلفت.

- دور "مريم" أحلى دور جالي في حياتي، وأشكر المخرجة ياسمين أحمد كامل، والمؤلف يوسف وجيه

(إسلام جمال عن دور "شريف")

- "شريف" إتربى بطريقة خلت كل حاجة عنده بمقابل

- "شريف" كان بيؤذي اللي حواليه، وشريكة حياته تحديدا، لكن مقدرتش أكرهه

(المخرجة ياسمين أحمد كامل عن دور جلا هشام "هدير")

- شخصية جلا هشام ضحية. التوازن في البيت المصري غلط، والأمهات بتربي الست راجل، وتدلع الراجل عشان يعمل اللي هو عايزه

(جلا هشام)

- كنت خايفة قوي من دور "هدير" وشفتها شريرة، وخفت أي حد مزنوق في دور زي ده يكلمني

- في المشهد الأخير والانهيار المخرجة سكتت اللوكيشن كله، وأستاذة ياسمين جهزتني للمشهد، وإسلام جمال استفزني، وهنادي قالت الكلام بشكل خلاني انهار، وأستاذة سلوى كانت بتبصلي بصات تخليني أعيط

(أحمد كشك)

- دور "عصام" عن شخص مهمل، وهو ملك الشماعات والحجج

- شخص رشحني في الدور للمخرجة، وهي عارضت ترشيحي في الأول

- رحت اجتماع مع المخرجة وعملت كل الحاجات عشان تخليني أمشي، وصممت آخد الدور

(المخرجة ياسمين أحمد كامل)

- أنا فعلا ضغطت على أحمد كشك، عشان شفت له كذا حاجة، وحسيت إنه مش حينفعني في الدور

- دور "عصام" 3 ممثلين في بعض، وكنت عايزة أتأكد