شاهد كواليس تسجيل أول أغنية لمطرب الطشت مع هاني شنودة

فى سينما وتلفزيون

الأحد , 10 أكتوبر 2021 - 02:04

عرض برنامج "الحكاية" من تقديم الإعلامي عمرو أديب على قناة MBC مصر كواليس تسجيل أول أغنية لمطرب الطشت "عم سيد"، من إنتاج الموسيقار هاني شنودة.

ووصف هاني شنودة تجربة تسجيل أغنية "عصفور في ليل الشتا" قائلا: "الراجل ده موهوب جدا، ونجم من نجوم الأغنية الشعبية، وأنا ميفرقش معايا إذا كان بيعرف يقرا ويكتب ولّا لأ. المهم إنه بيعرف يغني، ويعرف يلعب إيقاع مع الغنا. ولما سألته مين علمك قال كنت بمشي ورا اللي بيعملوا الأراجوز وأشوفهم بيعملوا إزاي، وأروح البيت أجيب أي عصايتين وألعب بيهم على أي صفيحة."

وعبرت كاتبة الأغنية مروة أمين أيضا عن سعادتها بهذا العمل قائلة: "لما شفت عم سيد مجاش في دماغي الكلمات، اللي جه في دماغي أنا نفسي الراجل ده حد يكتشفه. بالصدفة شفت تغريدة لأستاذ هاني شنودة بيقول أنا بدور على عم سيد، علطول عملت "ري تويت". أنا فاكراه عايز يكتشفه كطبال درامر، الراجل موهوب في الطبلة."

وأضافت: "لقيتهم بعدها بيقولوا بندور على كلمات لعم سيد، رحت كاتبة الكلمات وعاملة منشن للموسيقار، وسبحان الله تم اختيارها وكانت مفاجأة لطيفة جدا. أنا فرحانة لعم سيد وفرحانة لنفسي وفرحانة بفرحة الناس."

وأكد عم سيد سعادته بهذا التعاون قائلا: "الفرحة مش سايعاني خالص إن أنا مع الأستاذ هاني شنودة ذات نفسه. مكنتش أتخيل حاجة زي كده. الأغنية دي محسساني إن شاء الله ربنا حيكرمنا وتكبر بأمر الله."