ساندي: "سمكري البني آدمين" طقطقلي رقبتي وسببلي إصابة من سنتين

فى سينما وتلفزيون

السبت , 4 سبتمبر 2021 - 20:55

كشفت الفنانة ساندي عن مرورها بتجربة صعبة في العلاج على يد "سمكري البني آدمين"، لا تزال تعاني من مضاعفاتها حتى الآن.

وفي مداخلة هاتفية مع الإعلامي سيد علي ببرنامج "حضرة المواطن" على قناة الحدث اليوم، قالت ساندي: "شفتله ستوريز عند فنانين كتير، فسألت زمايلي يا جماعة هو الراجل ده بيعالج بجد، عشان أنا عندي مشكلة اعوجاج في عمودي الفقري، وقالولي إن الراجل ده شاطر وريحنا جدا."

وأضافت: "هو طبعا مش دكتور، فمش مهتم بأشعة إكس، ولا برنين ولا أي حاجة. طقطقلي رقبتي، وبعدها بأسبوع كان في ختام مهرجان الجونة السينمائي، وفجأة حسيت إني مش قادرة أقف، ونقلوني المستشفى. لما عملت أشعة الدكتور قاللي إنت عملت حادثة؟ أصل الغضروف لامس النخاع الشوكي كان يشلك شلل رباعي، ولما وريته فيديو كنت لسه منزلاه للدكتور، قاللي طبعا ده اللي عملك كده."

وأوضحت ساندي أنها طلبت من أخيها التحري عن هذا المعالج، وعرفت أنه قام بتزوير بطاقتين، فكتبت ذلك في تحذير نشرته قبل عامين.

وعن حالتها الصحية الآن، قالت: "أنا لحد دلوقت مصابة، أوقات كثير الدم مبيوصلش للمخ مظبوط من الغضروف اللي هو عامل لي فيه مشكلة، ببقى في حالة إغماء."