دياب يرد على تصريحات هاني محروس في "الحكاية": كذب وافتراء

فى سينما وتلفزيون

الثلاثاء , 27 يوليو 2021 - 02:07

رد الفنان دياب على تصريحات المنتج ومهندس الصوت هاني محروس لبرنامج "الحكاية"، حول خلافه مع المنتج نصر محروس.

وفي مداخلة هاتفية مع الإعلامي عمرو أديب في برنامج "الحكاية" على قناة MBC مصر، تناول دياب النقاط التي ذكرها هاني محروس، بداية من كلامه عن صرف مرتب له خلال مدة وجوده في الشركة، وقال: "أنا خدت مرتب فعلا لمدة سنة في 2006، ومخدتش في سنوات 2005 و 2007 و 2008 و 2009. في 2006 كان بيديني 1500 جنيه في الشهر، مبيكفوش حق المواصلات من إمبابة مكان سكني لغاية فري ميوزك في مصر الجديدة. وبعد كده قطع المرتب، ولما والدتي إتوفت في 2006، ومكانش معايا فلوس آكل وكلمتهم قالولي مفيش فلوس."

وعن عدم توريده مبالغ مالية لمدة 6 سنوات قال: "دي كذب وافتراء، أنا باعت لحضرتك مخالصة 2017 ممكن تعرضها للجمهور، دي آخر مخالصة من الشركة عن أعمالي في 2017. في 2018 لما وردت الفلوس كانت بدأت المشاكل، وقال لي مفيش مخالصة، يا إما تمضي على عقد جديد وطبعا عقد مجحف أكتر من اللي قبله."

وعن قوله "عمرنا ما قفلنا باب الأستوديو"، قال دياب: "الكلام ده كذب وافتراء، وحضرتك معاك محاضر إثبات الحالة إن الأستوديو كان مقفول."

وعن الكلام عن اختفائه الدائم، قال: "في 2011 و 2012 أستاذ نصر محروس كان عايش في الجونة وكان بييجي القاهرة زيارات، وفي 2013 و 2014 كان عنده مشاكل شخصية مينفعش أتكلم فيها، وكان مختفي تماما. وابتدينا في 2013 سجلنا ألبوم يا واد يا سوسو بطريقة مش لطيفة، وأشتكيت لهاني."

وعن الحديث عن أن مشاكله تسببت في انفصال مديرة أعماله عنه، قال: "مديرة أعمالي الموكلة من قبل فري ميوزك كان عقدي انتهى، وهي مشكورة كملت معايا لغاية ما إتجوزت وبقت حامل وحتسافر تولد في أمريكا، فسابت الشغل وجبت حد تاني."

وعن أن نصر محروس "بعته لحد يعلمه التمثيل"، قال دياب: "أنا بدأت تمثيل في 2014 في مسلسل ساحرة الجنوب من إخراج دكتور أكرم فريد، وهو صاحبي من سنة 2000، ولما إتعرفت عليه مكنتش أعرف أستاذ نصر. أكرم كان عنده ورشة تمثيل، وقال لي تعالى معايا عشان عايزك في مسلسل، ملوش علاقة بأستاذ نصر."

وعن أغنية "100 وش"، قال: "أغنية 100 وش أنا مسجلها عند هاني في الأستوديو، في حضور ومباركة أستاذ نصر محروس، وحاطط في ورق القضية إني غنتها من غير إذنه وكنت حسن النية."