قرأ الإعلامي يوسف الحسيني، خلال تقديمه حلقة السبت من برنامج "التاسعة" على القناة الأولى المصرية، بوست نشرته الفنانة حلا شيحة في إنستجرام، أعلنت فيه ندمها على بعض مشاهدها في فيلم "مش أنا".
وعلق الحسيني على فقرة من البوست كتبت فيها حلا شيحة "أنا إتفاجئت جدا بنزول كليب يجمع فيه مشاهد متفرقة من الفيلم و في أيام ذي الحجة"، وقال: "الكليب لما ينزل بعد أيام ذي الحجة أو قبلها يبقى مفيش مشكلة؟"
وتعليقا على فقرة أخرى من البوست كتبت فيها "إحنا يمكن نجحنا بمقاييس الدنيا بس صدقوني بمقاييس ربنا إحنا لم و لن ننجح"، قال: "مقاييس ربنا محفوظة عنده، منقدرش نقرر إننا عارفين مقاييس ربنا."
كما علق مقدم البرنامج على فقرة أخرى جاء فيها "أنا عارفة و متأكدة إن زملائي جواهم خير بس للأسف فتنة الشهرة و النجاح مش بتخلينا نشوف ونقيس الأمور صح"، وقال: "اتهام مش في محله، والجمل غير موفقة."
وتعليقا على فقرة "الكليب ده ميرضيش ربنا و أنا عيطت لإني شفت نفسي في المشاهد دي. دي كانت زلة نتيجة ظروف مريت بيها"، قال: "طب عملتيها ليه أصلا، وليه وافقتي على الفيلم من البداية..إحنا مش مطالبين ندفع تمن زلات حد."
وعلق أيضا على فقرة كتبت فيها "أنا مش حتكسف من حد أنا تبت من المشاهد دي." وقال: "تبت عن إيه؟ ده بالنسبة لي سؤال جدلي جدا. أنا مش قادر أفهم."