شرحت الفنانة ساندي كواليس إعلان صورته مؤخرا لإحدى العلامات التجارية، واعتقد البعض أنها صورته فوق قمة الهرم.
وخلال اتصال هاتفي مع الإعلامي عمرو أديب في برنامج "الحكاية" على قناة MBC مصر، قالت ساندي: "الحقيقة ده إعلان، وإحنا كنا بنقدم إن أنا مصرية فبنقدم البراند من خلال مصر والمعالم بتاعتنا، وده كان رؤية المخرج حسام حامد وعجبتني قوي."
وأضافت: "أنا مكنتش باغني وأرقص فوق الهرم، المفروض إن أنا باستمد الطاقة من الهرم عشان أغير مفهوم الفاشون في مصر، ودي حاجة في علم الطاقة إن الأهرامات من أقوى رموز الطاقة."
وأكدت ساندي أنها لم تصعد إلى قمة الهرم بالفعل، وقالت: "كانت فكرة لطيفة، اتصورت على كروما وإتركبت، الواحد بيطلع ينام على السرير بالعافية. هو جرافيكس بس الجمهور كتر خيره قعد يعمل تكهنات وصحيت لقيت الدنيا مقلوبة، وطبعا مكانش القصد أي إهانة."
وردا على سؤال عن حدوث أي تواصل بين الجهات المسؤولة عن الآثار وبينها، قالت: "هما كلموا المنتج شادي عصام، وقالوا إحنا مستائين جدا، وهو وضح لهم وبعتنالهم الشوت اللي فيها إن ده جرافيكس وتفهموا الموقف جدا بمنتهى الرقي. وأعلنت عندي وفهمت الجمهور إن ده مينفعش في الحقيقة لإنه مخالف للقانون، وكان مجرد شوت جرافيكس."