هبة قطب: بنتي حاسة بالقهر والعنصرية الشديدة

فى سينما وتلفزيون

الأحد , 27 يونيو 2021 - 23:03

علقت الأستاذة الدكتورة هبة قطب، استشارية العلاقات الأسرية، على المشكلة التي أثارتها ابنتها دينا هشام، عندما رفض أحد الأندية نزولها إلى حمام السباحة بالمايوه المعروف بـ" البوركيني" أو "المايوه الشرعي".

وفي مداخلة هاتفية مع الإعلامي خيري رمضان والإعلامية كريمة عوض في برنامج "حديث القاهرة" على قناة القاهرة والناس، قالت هبة قطب: "المشكلة كلها تدور حول كلمة واحدة هي الليبرالية في التصرفات والتفكير، وعدم إعطاء الذات الحق إني أحكم على الآخر. دي مشكلة ما زالت للأسف موجودة كتير جدا في المجتمع المصري، وبالذات هي متضخمة جدا لما نوصل للبنات أو الإناث أو السيدات."

وأضافت: "بنتي حاسة بالقهر فعلا، ممكن حد يقول دي مش مشكلة ورفاهية زيادة، لكن المسألة تراكمية. البنت حاسة إنها في بلدها وفي مرحلتها السنية عايزة استمتاع بريء جدا بخروجة مع أصحابها. ممنوع تدخل المطعم ده وتروح الحتة دي وتستمتع في المكان ده..هي حاسة بالعنصرية الشديدة والتفريق الشديد في المعاملة."

وعن رأيها في بداية الحل لهذه المشكلة، قالت: "الحقيقة الإعلام هو دايما منبر التغيير، وأنا شايفة اللي بيحصل صحي جدا دلوقت. لكن عشان يبتدي يدخل في حيز التنفيذ، طبعا أنا لا فقيهة دستورية ولا أفهم حاجة في القانون، لكن مش قادرة أفهم إزاي لايحة داخلية تتعارض مع دستور ومع مادة في القانون. إزاي الدستور بيديني حريتي ألبس اللي عايزاه، ولايحة داخلية في حتة تقول لأ لبسك مش عاجبني روحي غيريه."