رئيس دار الأوبرا: لم نصدر تعليمات بتسميم أو قتل القطط

فى سينما وتلفزيون

السبت , 19 يونيو 2021 - 23:39

نفى دكتور مجدي صابر، رئيس دار الأوبرا المصرية، إصدار أي تعليمات بقتل القطط في دار الأوبرا، وذلك بعد ما أثير حول واقعة قتل قطة شهيرة، وهي القصة التي تم تداولها بشكل كبير عبر مواقع التواصل الاجتماعي ووسائل الإعلام.

وفي مداخلة هاتفية مع الإعلامية لميس الحديدي ببرنامج "كلمة أخيرة" على قناة ON، قال رئيس الأوبرا: "هي كانت قطة واحدة موجودة في المسرح الصغير، والدة وبقالها سنين موجودة. لكن في الآونة الأخيرة ولدت وبقت في شكوى منها، فإحنا جبنا الجهات المختصة وهي مديرية الطب البيطري عشان تعالج الموضوع، وخدوا ولادها، أو حد من العاملين خدوا ولادها حطهم بره في الجنينة ولا حصل لهم أي حاجة، وهما تعاملوا مع القطة بطريقتهم. أنا الحقيقة معرفش تعاملوا معاها إزاي لإن دي مش شغلتي، هي شغل الشؤون الإدارية، وهما تعاملوا مع الظاهرة بناء على تقرير من أطباء عندهم..وبالمناسبة عندنا أكتر من 20 قطة موجودة في ساحة الأوبرا محدش بيعمل لها حاجة."

وأوضح رئيس دار الأوبرا أن تحقيقا كبيرا تم فتحه بمجرد علمهم بما حدث للقطة، إلى جانب أن وزيرة الثقافة دكتورة إيناس عبد الدايم طلبت فتح تحقيق كبير لمعرفة ما حدث، ومعاقبة المخطئ بالطريقة التي ينص عليها القانون.

وأضاف: "محدش خالص من عندنا إدى تعليمات بإن إحنا نسم أو نموت قطط. بالعكس، لما تحصل أي مشكلة بياخدوا الحيوان صاحي وينقلوه مكان تاني بعيد عن الأوبرا لما حد يشتكي. وليس من اللائق يبقى في جمهور موجود وفنانين على خشبة المسرح، وقطط تخش وتخرج وتعمل لهم ذعر."