وجه الفنان أكرم حسني للإعلامي عمرو أديب، خلال مداخلة مع برنامج "الحكاية"، السؤال الذي تدور حوله أغنيته الجديدة مع الفنانة هيفاء وهبي "لو كنت".
وقال أكرم حسني عن فكرة الأغنية: "أنا بحاول طول الوقت أخرج عن الإطار التقليدي في الأفكار شوية، لأني باستخدم الأغاني طول الوقت كأداة تخدم على الأفلام أو المسلسلات أو الإعلانات. طول الوقت كان شاغلني فكرة بنهزر بيها في القعدات، لو مكنتش بني آدم ممكن تبقى إيه. ولقيتها ممكن تبقى فرضية لذيذة كل الناس تتفاعل معاها."
وأضاف: "من ساعة ما بدأنا الهاشتاج إمبارح، كل التفاعل ده وضح لنا إن الناس عندها خيال، والموضوع يستحمل يحصل فيه جدل."
وعن سبب تفكيره في مشاركة هيفاء وهبي، قال: "وأنا شغال على فرضية « لو كنت »، قلت ممكن نبقى شايفين وجهة نظر الراجل لو فكر يكون حاجة تانية، والست لو فكرت تكون حاجة تانية هتكون إيه. طول الوقت الست مشغولة بإنها تبقى أنثى وجميلة ودلوعة، لازم تشوف هيفا،" وعلق أديب قائلا: "دي صفات هيفا طبعا."
وسأل أكرم حسني عمرو أديب: "لو مكنتش بني آدم كنت تحب تبقى إيه؟" فأجاب: "حوت، ميه كتير تطلع وتنزل، واو."
يذكر أن فيديو كليب أغنية "لو كنت" نشر على قناة أكرم حسني بموقع يوتيوب، وعلى القناة الرسمية لهيفاء وهبي أيضا، والأغنية من كلمات وألحان أكرم حسني، وتوزيع توما، والكليب من إخراج حسام الحسيني.