ليلى علوي عن ظهور شريف دسوقي في "ماما حامل": كوميديان مش معتاد

فى سينما وتلفزيون

الأربعاء , 9 يونيو 2021 - 01:34 | اخر تحديث: الأربعاء , 9 يونيو 2021 - 01:40

علقت الفنانة ليلى علوي على الظهور الخاص للفنان شريف دسوقي في فيلمها الجديد "ماما حامل".

وخلال استضافتها في برنامج "كلمة أخيرة"، الذي تقدمه الإعلامية لميس الحديدي على قناة ON، قالت ليلى علوي: "ربنا يتمم شفاه على خير. وهو كراكتر مميز جدا، وأنا كنت من أول الناس اللي سقفت له في فيلمه اللي كان في مهرجان القاهرة السنة اللي قبل اللي فاتت، اللي أخد جايزة عليه، وبجد هو عنده حاجة مختلفة. هو ممثل وكوميديان مش معتاد ليه الطابع بتاعه."

وردا على سؤال عن العمل مع الجيل الجديد من الممثلين في الفيلم قالت: "أنا محستش باختلاف. لإننا كنا بنشتغل طول الوقت، وهما لذاذ جدا. حمدي الميرغني ومحمد سلام صحاب جدا، وطول ما إنت قاعدة معاهم تسمعي حاجات مستمتعة بيها، وإحنا بنعمل بروفات للمشاهد أو قراية أو ميزانسين مع المخرج. هما ممتازين ما شاء الله."

كما وصفت ليلى علوي ظروف العمل في ظل وجود فيروس كورونا، وقالت: "أنا ملتزمة جدا. طبعا بحب كل الناس، مبسلمش وعلطول بالماسك والكحول، وبقول يا رب احمي. والحمد لله لا الفيلم ولا المسلسل « ست الهوانم » ولا الإعلان حد عيي من الكاست."