هذه المسرحية شاهدها بيومي فؤاد 38 مرة

فى سينما وتلفزيون

الثلاثاء , 8 يونيو 2021 - 20:02 | اخر تحديث: الأربعاء , 9 يونيو 2021 - 00:01

استعاد الفنان بيومي فؤاد، خلال حلوله ضيفا على برنامج "سعفان في التليفزيون" على قناة MBC مصر، ذكرياته مع مسرح الجامعة في كليته، كلية الفنون الجميلة في حي الزمالك، وتحديدا مسرحية انبهر بها وشاهدها 38 مرة.

وقال بيومي فؤاد: "لما دخلت الكلية عدت عليا سنة إعدادي فنون جميلة كنت بتفرج على مسرح الكلية بس ومبهور. كان في مسرحية اسمها أولادنا في لندن شفتها حوالي 28 أو 38 مرة. كان التيكيت بجنيه، ونطلع المسرح لغاية الدور الخامس، كان عبارة عن مدرج واخدين منه جزء وعاملين ستيدج صغير وعاملين له كواليس. لقيت عيال محترفة جدا من اللي ينفع تشوفهم في مسرح القطاع الخاص، ومسرحية كل ما تشوفها تحلو، بيعرفوا يقولوا إفيهات، لكن مكملوش رغم إنهم جامدين جدا."

وأضاف: "المهم، اللي خلاني أقول إني ينفع أبقى ممثل إني دايما وأنا بتفرج عليهم يا أقول الإفيه قبلهم، يا أقول حاجة أعلى من وجهة نظري، وبعد ما إتصاحبنا بقيت أقول لهم الإفيه فيعجبهم قوي، يا إما لو في ممثل بيستغرب أو بيزعل أو بيفرح تلاقيني وأنا قاعد بعمل الريأكشن وأنا مش واخد بالي، وزمايلي بدؤوا ياخدوا بالهم، وبقيت أقول لنفسي أنا أعرف أعمل كده."

يذكر أن بيومي فؤاد يعرض له في السينما حاليا فيلم "ماما حامل"، من بطولة ليلى علوي، بيومي فؤاد، حمدي الميرغني، محمد سلام، هدى الإتربي، نانسي صلاح، والفيلم من تأليف لؤي السيد، وإخراج محمود كريم.

برنامج "سعفان في التليفزيون" يقدمه الفنان الشاب مصطفى البنا، ويعرض فقرات متنوعة ويناقش قضايا اجتماعية غنية بأسلوب كوميدي جذاب، مع تقديم عدد من الإسكتشات الترفيهية والغنائية بأسلوب ساخر.