طارق الشناوي: لا صلح أو خصام مع غادة عبد الرازق..ما حدث العام الماضي يتكرر

فى سينما وتلفزيون

الاثنين , 7 يونيو 2021 - 00:28

أوضح الناقد الفني طارق الشناوي أنه ليس في حالة صلح أو خصام مع الفنانة غادة عبد الرازق، وأن رأيه في مسلسلها في رمضان الماضي "لحم غزال" تكرار لرأيه في مسلسلها في رمضان قبل الماضي "سلطانة المعز".

وخلال مداخلة هاتفية مع الإعلامي خيري رمضان، والإعلامية كريمة عوض في برنامج "حديث القاهرة" على قناة القاهرة والناس، استعاد طارق الشناوي ما حدث العام الماضي، عندما قال في سياق تقييم الأعمال الرمضانية إن مسلسل "سلطانة المعز" لن يكمل السباق، مشيرا إلى أنه وصف في نفس الحديث غادة عبد الرازق بأنها ممثلة موهوبة ولا يزال هذا هو رأيه فيها.

وقال طارق الشناوي: "هي ممثلة موهوبة لا شك، اختياراتها سيئة جدا في السنوات الأخيرة لا شك، وأول حاجة خاطئة بتعملها إنها تبحث دائما عن سبب آخر..هل سلطانة المعز بعد مرور سنة حد شايف إن هذا المسلسل يستحق التواجد؟ أكيد لأ."

وأضاف: "بعد ما قلت هذا الكلام هي محبتش تواجه الحقيقة، فقالت يا جماعة متصدقوش فلان، أنا شخصيا ليا تجارب سيئة معاه، وأما بعوزه يمدح بتفق معاه على المديح. وقالت كلام يدخلها تحت طائلة القانون إلى السجن. لأن ده اتهام أو هتك عرض وشرف طبقا للقانون. طبعا بعد كده اعتذرت وقدمت اعتذار عن طريق النقابة، وقالت الصفحة اخترقت، فهي مش عايزة تواجه الحقيقة."

وتابع: "السنة دي نفس الحكاية، مش عايزة تواجه الحقيقة. لحم غزال ينطبق عليه اللي قلته في سلطانة المعز. إنه مبيحملش شيء جديد غير اللي إنت تعرفه عن غادة، غير مفرداتها اللي بتقدمها. هي لا تواجه الزمن فبيقهرها الزمن."

وتعليقا على إشارة خيري رمضان إلى المشاهدات الجيدة التي حظي بها المسلسل في الخليج، قال طارق الشناوي: "أوكي، لكن هل هو من المسلسلات الأهم في الساحة؟ الواضح لأ. المهم مش في ده، الأهم إنك بتنصح حد، ممكن تكون نصيحتك مش صحيحة، لكنها مخلصة، إنها تعيش الزمن اللي هي فيه. هي معركتها النهاردة في حاجة واحدة، إنها مواليد 70 وليس 65، إن عندها 51 سنة مش 56 سنة، ليه؟ عشان مصرة تقدم نفس الشخصيات اللي كانت بتقدمها قبل كده، ودي الحقيقة معركة خاسرة."