أوضحت الفنانة حورية فرغلي أن الفنان محمد رمضان لم يسأل عليها خلال فترة خضوعها للعديد من العمليات الجراحية، رغم أنها ساعدته في بدايته.
وخلال استضافتها في برنامج "واحد من الناس"، الذي يقدمه الإعلامي عمرو الليثي على قناة الحياة، قالت حورية فرغلي: "من ضمن الناس اللي أنا استغربتها جدا، أنا مش بشحت السؤال، محمد رمضان. عبده موتة هو اللي كلمني وأستاذ أحمد السبكي يشهد على ذلك، وطلب مني أبقى بطلة قدامه علشان مكانش في أبطال ساعتها عشان كان لسه وجه جديد، وعايز بطلة ليها اسم تطلع قدامه. أنا عملت الفيلم ده، وعملت قلب الأسد وحياة المصحف الشريف مخدتش مليم."
وأضافت: "فاتت الأيام وكان هو بيصور تقريبا الأسطورة، وأنا كنت بصور طلق صناعي، وكنا في نفس اللوكيشن وبيني وبينه باب، وعرف إني موجودة. حاولت أروحله قالولي بيغير، قلتلهم أنا موجودة عايزة أسلم عليه، ومحاولش يسلم عليا."
وردا على سؤال "عايزة تقوليله إيه النهاردة؟" قالت: "أقوله إيه، كفاية اللي هو فيه."