منى زكي: كان عندي كرباج داخلي بسبب لغة هنا في "لعبة نيوتن"

فى سينما وتلفزيون

الثلاثاء , 18 مايو 2021 - 23:02

تحدثت الفنانة منى زكي، خلال استضافتها في حلقة اليوم من برنامج "كلمة أخيرة"، الذي تقدمه الإعلامية لميس الحديدي على قناة ON، عن صعوبات واجهتها في تجسيد شخصية "هنا" في مسلسل "لعبة نيوتن".

وقالت منى زكي: "سألت أستاذ تامر محسن إنت اخترتني ليه، أو شايف إيه عندي لازم يتغير. هو قال حاجات كتير، بس أول حاجة قالها موضوع اللغة، قلتله لأ دي سهلة جدا، بعدين اكتشفت لأ، دي مش سهلة خالص، هي أصعب من لو بتحاولي تتكلمي إنجليزي كويس."

وأضافت: "لإن إنت جواكي كرباج داخلي، ومتعلمة وعارفة إيه الصح، وجواكي كرباج داخلي شخصي كل ما تغلطي في دماغك وبقك وكل حاجة، فلازم تحاولي تمنعي الكرباج ده، وتحسسي نفسك إن ده العادي وتتعاملي. بس دي كانت أبسط حاجة، أو حلتها مع نفسي بسرعة قوي."

وتابعت: "في صفات أساسية في شخصية هنا ما تخصنيش، بعيدة عني محستهاش وماعاشرتهاش. تذبذب هنا ما عاشرتوش قبل كده في حياتي. أنا شخصية أفكر كتير بس لما آخد قرار يبقى هو ده. والـ Anxiety، أنا عندي Anxiety على فكرة كنت ابتديت أخف منه وقل جدا. إني أحاول أجيب ده كل مرة في مشهد كان شيء بائس بالنسبالي ومتعب قوي وسخيف."

يذكر أن عن مسلسل "لعبة نيوتن" عرض في الموسم الرمضاني الماضي، وهو من بطولة منى زكي، محمد فراج، محمد ممدوح، سيد رجب، عائشة بن أحمد ونخبة من نجوم الفن. المسلسل من تأليف وإخراج تامر محسن.