مي عمر: شيرين تدخلت لاستبعادي من "طريقي"..كان عندها مشاكل مع محمد سامي

فى سينما وتلفزيون

السبت , 8 مايو 2021 - 22:05

كشفت الفنانة مي عمر عن رد فعلها بعد تدخل الفنانة شيرين عبد الوهاب لاستبعادها من مسلسل "طريقي".

وخلال الجزء الثاني من حوارها مع الإعلامية بسمة وهبة في برنامج "العرافة" على قناة المحور، قالت مي عمر: "المخرج محمد شاكر خضير كلم محمد سامي، وقال له عندي دور حلو قوي لمي، هي بتمثل برّاك؟ فرد بإن مفيش مشكلة عنده، لكن سأله: أنا عارف إنك بتعمل مسلسل شيرين، وأنا عندي مشاكل مع شيرين، هي عارفة إنك عاوز مي في دور؟ والمخرج رد: دي اختياراتي ومحدش بيتدخل فيها."

وأضافت: "كلمت المخرج وقعدت معاه ومع تامر حبيب، وقالوا لي الدور مرسوم عليكي. أنا بأحب كتابات تامر حبيب جدا، والدور عجبني. الدور كان مكتوب 15 حلقة، أخذتهم وسافرت الغردقة وكان محمد ساعتها بيصور فيلم هناك، عشان أذاكر الدور."

وتابعت: "اتصلوا بيا عشان أروح تجربة اللبس قبل التصوير. وإحنا راجعين في الطريق شاكر أو المنتج الفني كلمنا وقال لمحمد سامي: هي المشاكل بينك وبين شيرين كبيرة قوي للدرجة دي؟ هي مش موافقة مي تبقى في المسلسل. كان عندها مشاكل ساعتها مع محمد."

وعن رد فعلها بعد استبعادها من المسلسل، قالت: "ما زعلتش على الدور، مع إني حبيته جدا. لأني بأحس إن ربنا بيقف معايا ويساعدني. في الأول قلت أكيد الدور حيسقط لكن نجح جدا، فقلت أكيد ربنا شايل لي حاجة أحسن، وبعدها بسنة عملت الأسطورة."

ويعد برنامج "العرافة" امتدادا لبرامج بسمة وهبة الرمضانية والتي تعتمد على كشف أدق تفاصيل النجوم وخباياهم وإظهار الوجه الآخر لهم، مما يؤدي لصدمة كبيرة لدى الضيوف والمشاهدين، من المفاجآت التي تكشفها خلال الحوار وعن كيفية معرفتها بأدق تلك التفاصيل في الحياة الخاصة للفنانين.