لميس الحديدي: مامي وسط العواصف هادية..فجأة لقت نفسها في قلب شائعة ناهد شريف أمي

فى سينما وتلفزيون

الأحد , 21 مارس 2021 - 23:01

استهلت الإعلامية لميس الحديدي حلقة الأحد 21 مارس من برنامجها "كلمة أخيرة" برسالة لوالدتها.

وقالت لميس الحديدي: "قبل ما أبتدي الحلقة لازم أقول لها شكرا، أمي أو مامي زي ما بأناديها. لما أتسئل دايما مين سبب شخصيتك أو قوتك، زي ما في ناس كتير بيشوفوها، دايما بأرد وأقول أبويا الله يرحمه، لكن لما بأفكر شوية بألاقي إن أمي كانت أقوى كتير من أبويا. لإن والدي رغم إنه شخصية قوية جدا، وكلنا بنخاف منها ونعمل لها مكانة، لكن هو في حقيقته كان شخص قلوق جدا زيي أو أنا زيه."

وأضافت: "لكن مامي أو أمي كانت دايما هي سند الطمأنينة في بيتنا. تلاقيها وسط العواصف هادية، وسريعة التصرف لكن في صمت، وفكرة الهلع والفزع مش أسلوبها في الحياة. وغالبا أنا إتعلمت دا منها."

وكشفت لميس الحديدي عن تأثير شائعة أن والدتها هي الفنانة الراحلة ناهد شريف قائلة: "فجأة مامي لقت نفسها في قلب الشائعات، وإحنا أسرة محافظة عادية جدا. فجأة بقت أم لميس الحديدي هي الفنانة ناهد شريف. أهم إشاعة في العالم العربي، تكتب والدة لميس الحديدي تطلع لك صورة ناهد شريف، والمشكلة إن أمي مش ناهد شريف. كانت دايما تقول لي إطلعي قولي وإنفي، وأقول لها مامي دا كلام فارغ ننفي إيه. إحنا إتعودنا في شغلانتنا ما ننفيش كلام لا يليق حتى ننفيه."

وتابعت: "مدام رجاء الجداوي الله يرحمها، بأعتبرها أيضا كانت قريبة جدا مني وفقدناها السنة الّي فاتت، كانت تشوفها في عزاوات كتير، ولما تشوفها تسلم عليها وتهزر معاها، وتقول لها إزيك يا مدام ناهد."