أحمد زاهر: بأحمد ربنا ما نزلتش ليلى وهي "بيبي"..ولما إتولدت حسيت ربنا كان حياخدها مني

فى سينما وتلفزيون

الأحد , 14 مارس 2021 - 22:53

كشف الفنان أحمد زاهر أنه فكر في التخلص من حمل زوجته بابنته الثانية ليلى، بسبب الظروف الصعبة التي كان يمر بها في ذلك الوقت.

وخلال حواره مع الفنانة مي عمر في برنامج "بصراحة مع" على قناة MBC1، قال أحمد زاهر: "بعد ما إتجوزت وخلفت ملك، كنا عاملين كل الموانع، وبعدين فجأة هدى حامل في ليلى، بقيت قلقان وخايف أفشل في تحمل المسؤولية. مكانش عندي شغل السنة دي أو رفضت حاجات، لأ أنزله. هدى كانت رافضة تماما تنزل البيبي، وأنا قلت بيبي تاني في الظروف دي حاصرف عليه إزاي."

وأضاف: "فضلت كده لغاية ما أمي كلمتني مرة في التليفون، وقالت لي حلمت حلم، جالي هاتف بالآية « ولا تقتلوا أولادكم خشية إملاق »، دي عطية من عند ربنا سبحانه وتعالى وإنت ترفضها، إنت مجنون. الجملة دي أثرت في قوي وحسيت برعشة، وقلت خلاص حسيبها وعلى الله."

وتابع: "أنا بأدخل مع مراتي قوضة العمليات. أول ما إتولدت ليلى نزلت زرقا، والحبل السري مربوط حوالين رقبتها، ومن غير صوت، مر علي دقيقتين زي سنتين، وشريط سينما في حياتي، كنت حاضيعها وأهي ضاعت، حأقول للست دي إيه. لغاية ما عيطت ولونها بدأ يفتح وأنا عيطت، لدرجة إن الدكتور قال لي أرجوك خد بنتك وإطلع بره. كانت تجربة صعبة وقاسية جدا، وأحمد ربنا سبحانه وتعالى إني ما أخدتش القرار أنزل البيبي، وليلى أجمل حاجة في حياتي."