أذاعت الإعلامية لميس الحديدي، خلال تقديمها حلقة الإثنين من برنامجها "كلمة أخيرة" على قناة ON، رسالة للفنانة إلهام شاهين بالفيديو، بمناسبة اليوم العالمي للمرأة.
وقالت إلهام شاهين في الرسالة: "أقول لكل امرأة، لكل ستات الدنيا، لكل ست ولكل بنت، كوني قوية ومتفائلة وشجاعة وطموحة، إنت لا تقلي عن الرجل في شيء، إحنا مش أحسن من الرجال لكن زينا زيهم. لازم ننجح، لازم نتعب، لازم نفكر في بكره، ولازم نكون دايما مبدعين."
وأضافت: "كل ست ممكن تبقى مبدعة في شيء، ما تضعفيش، ما تيأسيش، ما تستسلميش، لازم تفضلي دايما محاربة علشان توصلي للي إنت عايزاه، علشان تقاومي. لو في مرض حنقاومه وننتصر عليه ونخف، لو في مشكلة زوجية أو مشكلة عاطفية مع رجل، لأ، يا إما تحترمني وتديني كرامتي وقيمتي يا إما أنا مش عايزاك وأعتمد على نفسي. إوعي تعتمدي على الرجل، لا على جوزك، ولا على أخوكي، ولا على أبوكي، ولا على ابنك. اعتمدي على نفسك، وبأقل الإمكانيات الست ممكن تحقق أشياء، وأنا عملت ده في أفلامي، في « خلطة فوزية » كانت ست معدمة عايشة في العشوائيات، في أربع حيطان من غير سقف، وعملت لنفسها شغل."
وتابعت: "مش باتكلم عن كل ست فقط المتعلمة أو وصلت لمكانة معينة، لأ، أبسط النساء، إنت تقدري تعتمدي على نفسك، إوعي تخلي فكرة الرجل يسيطر عليكي، ومش من حقه، مش لمجرد إنه ذكر، وإنت أنثى يبقى هو مفضل في أي شيء."