ليلى علوي: متأكدة محمد الصغير في مكان أحسن بكتير

فى سينما وتلفزيون

السبت , 30 يناير 2021 - 23:01

قالت الفنانة ليلى علوي إن معرفتها بمصفف الشعر الشهير الراحل محمد الصغير تعود إلى عام 1982، عندما قدم قصة شعر حصلت على شهرة كبيرة، وهي متأكده من أنه في مكان أفضل بكثير.

وخلال مداخلة هاتفية مع الإعلامية لميس الحديدي ببرنامج "كلمة أخيرة" على قناة ON، قالت ليلى علوي: "أنا عيلتي صغيرة قوي، لأن أمي مش مصرية، محمد ومولي كانوا من العيلة، وولادهم كانوا من العيلة."

وأضافت: "محمد عمره ما سابني أو ساب صاحب في أي موقف مش حلو، أو في موقف فيه فرح، عمره ما اتأخر، مع كل البشر اللي عرفهم في حياته، أتحدى إن حد يقول إن محمد الصغير اتأخر في موقف فرح أو في موقف مرير إلا وكان محمد موجود."

وتابعت: "راجل عمل خير كتير في حياته، كان بيحس قوي، وإنسان قوي، وذكي جدا، وقوي الإرادة جدا. محمد عدى بظروف صحية وعدى منها...أنا متأكدة إن هو في مكان أحسن بكتير قوي، وإن روحه طايرة فوقينا وجميلة وطيبة زي ما هو، ومبتسم زي ما هو، وشايف إحنا كلنا بنحبه ونقدره قد إيه."