حوار : محمد عاشور
كتابة : أحمد هلال
تصوير : ياسمين السماحي

قد تكون طفلة صغيرة لم تتعد عامها العاشر بعد ، ولكن عندما تتحدث معها لن تشك لحظة بأنك أمام فنانة تعبت وبكت بحرقة من الإجهاد لتصل إلى حب معجبيها ، وعلى الرغم من تلقائيتها الشديدة إلا أن إجاباتها على أسئلة زوار موقع "في الفن" لم تعبر عن كونها أشقى وأصغر نجمة في بداية مشوارها الفني فقط ، بل على أنها النجمة الكبيرة "منة عرفة".

وبدأ فريق FilFan.com حواره الثاني مع نجمته على النحو التالي :

الفنانة الجميلة منة عرفة ، منورانا لتاني مرة في FilFan.com
ميرسي.

أتذكرين أول مرة أجرينا فيها المقابلة؟
أكيد.

هل أصحابك كلموكي عن الحوار ده بعدها؟
آه.

طبعا منة ليست جديدة على FilFan.com ، ولكن هناك بعض أصدقائك من زوار الموقع ممكن ألا يكونوا قد تعرفوا عليكي في المقابلة الأولى ، لذلك عرفي نفسك لهم مرة أخرى ، اسمك بالكامل؟
أنا منة الله السيد عرفة ، عندي 8 سنوات وماشية في الـ9 ، في ثانية إبتدائي وفي مدرسة "فيوتشر سكول".

تعلمين أن في الوسط المخرج الكبير شريف عرفة و المخرج عمرو عرفة فهل توجد صلة قرابة بينك وبينهما؟
لا إطلاقا ، مجرد تشابه أسماء.

هل دخلتي الفن عن طريق حد من أقاربك؟
لأ خالص ، وعشان الناس اللي فاهمة إن ليا أقارب في الوسط بقولهم لأ مليش ، بس عشان الممثلين أصدقائي وبيحبوني وأنا بحبهم زي ما بيحبوني وأكثر فساعدوني لحد ما وصلت للي أنا فيه.

نريد أن نعرف كيف بدأتي في الوسط الفني؟
في البداية كنت بعمل إعلانات ، وشافنوني مخرجين ومن ضمنهم الدكتور سمير سيف وعملنا اجتماع لأنه كان يبحث عمن تقوم بدور السندريلا في صغرها ، ودخلت الاجتماع على أساس أنه عايز يعرف أنا هاكون محرجة ولا لأ ، باتكلم كويس ولا لأ ، ثم قال لي مبروك عليكي الدور إنت فنانة ممتازة وإن شاء الله هيكون ليكي مستقبل وتبقي السندريلا الجديدة.

وما هي أعمالك بعد السندريلا؟
"مطب صناعي" و"راجل وست ستات" والحب كده" ، وفيلم لمهرجان الإذاعة والتليفزيون مع الممثل كريم كوجاك وده فيلم جديد.

هل كان هناك شقاوة أثناء تصوير أفلامك مع حمادة هلال و أحمد حلمي؟
هي مش شقاوة بالظبط بس عارف لما حد يحب ينكشك ، بس أنا كنت بتضايق في الأول عشان مكنتش فاهمة كدة بس ماما فهمتني إن ده هزار ، ففهمت وبقيت بنكشهم أنا كمان.

طب إيه أكثر فيلم من الفيلمين كان فيه لعب وشقاوة؟
هما الإثنين كانو كويسين معايا جدا ، بس في "مطب صناعي" مكنتش حاسة إني بمثل وبس ، كنت بلعب برضه ، فالفيلم ده كان فيه لعب وشغل.

طب أونكل أحمد كان بيلعب معاكي أكثر ولا أونكل حمادة هلال؟
لأ هما الإثنين كانو بيلعبوا معايا وأنا كمان كنت بحبهم ، وبجد أنا عايزة أقول حاجة للي شايفيني دلوقتي ، أنا مبقتش نجمة بسهولة ، أنا كنت باحبس نفسي في حجرتي وأجلس بالساعات أبكي من كتر الشغل ، ولكن طبعا اللي أنا وصلتلوا دلوقتي ده بفضل ربنا ومجهودي.

هل لكِ أخوة؟
3 أولاد وبنتين.

حد فيهم جرب يمثل أو يعمل إعلانات؟
لأ ، هي بس أخت من أخواتي كانت عايزة تمثل بس ماما قالتلها إن التمثيل هيتعبك ، وهى إقتنعت وشالت الفكرة من دماغها.

هل هتفضلي تمثلي على طول ولا هتيجي فترة تبطلي زي بعض الممثلين؟
إن شاء الله هامثل ، بس مثلا مي عمار دلوقتي اختفت مع أنها كانت من أشهر النجوم ، واللي عايزة أقوله إن هناك فترات بتيجي على الإنسان تجبره يقف شوية وبعدين يرجع تاني ، والممثلين كلهم مروا بتلك الفترة.

هل في حد بيشبهك بفيروز؟
أه المخرجين كلهم لما اشتغلت معاهم ، وقالولي إنتي هتعيدي عصر فيروز تاني.

هل إنت مبسوطة بده؟
بالتأكيد طبعا ، لأنها ممثلة عظيمة وكانت موهوبة وكل الناس بتشكر فيها.

قلتي من قبل أنك قمتي بعمل فيلم مع الفنان كريم كوجاك ، متى سيعرض؟
لسة مش عارفة.

مين كان بيشجعك على طول في التمثيل؟
ماما وإخواتي ، والممثلين بعد كدة والناس ، وأنا ببقى مبسوطة من ده.

هل فكرتي في الغناء؟
لا

بتحبي تسمعي أغاني لمين؟
بحب أسمع "أونكل" تامر و"طنط" شيرين ، وهما صحابي أصلا.

طب بتابعي أفلام أونكل تامر؟
طبعا.

نفسك تمثلي معاه؟
طبعا ، هو مرة بعتلي رسالة فاتصلت بيه ، وقلت له شكرا على الرسالة فقال لي عجبتك ، قلت له أكيد ، وبعدين قلت له أنا عايزة أعرض عليك حاجة ، أنا داخله فيلم جديد ممكن تيجي تمثل معايا ، قاللي هاتيديني دور حلو قلت له أكيد ، قالي موافق.

مفكرتيش تمثلي مع أونكل محمد فؤاد ، كثير من الأطفال شاركوه أفلامه؟
طبعا ده شرف كبير ليا.

إنتي عملتي دور السندريلا ، هل إنتي بتحبي تقدمي أدوار الاستعراض مثل أفلام فيروز؟
بالتأكيد ، وأنا أحب أفلام الممثلة العظيمة فيروز وكان نفسي أتعرف عليها.

هل عندك إيميل عشان معجبينيك يراسلوكي عليه؟
أنا عندي إيميلين واحد اسمه Menna lovers وفي واحد تاني على الفيس بوك Face Book.

بمناسبة الفيس بوك ، في ثلاثة آلاف واحد عليه بيقولوا إنهم أقاربك هل هذا الكلام صحيح؟
لأ طبعا ، يمكن يكونوا المعجبين.

طب بتدخلي على إيميلك وبتابعيه؟
أنا لسه داخله عليه إمبارح وشفت معجبيني ، وكلمتهم.

بتحلمي بإيه لما تكبري؟
بحلم أكون نجمة كبيرة والناس تحبني وأنجح وطبعا كل ده هيكون من فضل ربنا.

أنا عارف إن ليكي آراء قوية جدا ، واتكلمتي عن الديمقراطية وأغاني الفيديو كليب الجديدة من قبل ، زوار الموقع يحبوا يعرفوا الآراء دي؟

الكليبات الوحشة دي؟! هاقولك على حاجة المخرجين اللي بيعملوا الحاجات دي بيستغلوا الجسم ، بس إنما ده طبعا مش فن ، أما الديموقراطية فهي حكم الشعب بالشعب ، بس هاقولك على حاجة زي ما بيقولوا الناس في مصر كلها ، لازم تدافع عن حقك وتحارب عشان تاخده.

مفكرتيش تعملي حاجة للأطفال؟
أكيد طبعا ، لو اتعرضت عليا هعملها.

إيه آخر فيلم شوفتيه وعجبك؟
عجبني أونكل أحمد حلمي في "كده رضا".

طب ليه معملتيش مع أونكل حلمي فيلم تاني؟
كنت هاعمل معاه فيلمي اللي جي بس محصلش نصيب ، بس هعمل فيلم مع المخرج العظيم وائل إحسان وهو كتب القصة عشاني على فكرة ، وهيكون معايا حمادة هلال.

إيه أخبار الرياضة معاكي؟
أنا بلعب سباحة وبنط الحبل وبجري.

دخلتي بطولات في السباحة؟
لأ لسه.

إيه رأيك في الكورة؟
طبعا بتابعها.

أهلاوية ولا زمالكاوية؟
أهلاوية طبعا.

وإيه رأيك في ماتش الأهلي والنجم؟
لأ مشوفتوش كنت بصور ، بس كان فيه إعادة واتفرجت عليه وزعلت جدا.

يقال إن في جزء تاني من "راجل وست ستات" هل الكلام ده صحيح؟
آه فيه جزء تاني ، وكمان هنعرضه على المسرح بنفس الأبطال.

كلميني عن الكواليس في "راجل وست ستات" هل كان برده فيه لعب وشقاوة؟
طبعا كان فيه ، وأنا كنت أكثر واحد بتشاقة ، وعلى فكرة أنا أكثر واحدة في البيت بتشاقى وطبعا عشان أنا أختهم الصغيرة محدش بيكلمني.

إيه الجديد اللي هتقدموه للمسلسل في المسرح؟
هيكون هو هو.

كلمينا عن أصدقائك وعلاقتك معهم؟
أهم أصدقائي مريهام ومريم وإثنين توأم رادا وروان ، بنلعب طبعا كثير مع بعض بس داخل الفصل الميس "بتذاكر" فإحنا مينفعش نقاطعها ، يوووه أقصد الميس بتشرح فإحنا ماينفعش نقاطعها ، بس طبعا بنخرج ونحضر أعياد ميلاد بعض ، وأحب أقولهم لو شايفيني على FilFan.com ادعولي أنجح.

انتي مش شايفة إن التمثيل أخدك من حياتك كطفلة ولا قادرة توفقي بينهما؟
لأ أنا قادرة "أوقف" "أقوف" ، يووووه ، "أوفق" بينهم.

يومك عامل إزاي؟
أنا باصحى من النوم الساعة خامسة الصبح ، وبعدين بجهز لبسي و شعري ، وطبعا باخد عشر ساعات على ماصحى من النوم ، وبعد لما أكون جاهزة باستنى الباص ، وبعد مارجع من المدرسة لو معنديش شغل بغير هدومي ، وأعمل الواجب ، وألبس لبس عادي كدة وبنزل أشوف أصحابي.

هل إنت متواضعة؟
جدا.

هل أصبح لديكي أصدقاء جدد بعد دخولك الوسط الفني؟
بالتأكيد طبعا.

طب بتحبيهم زي صحابك القدامى؟
آه طبعا.

نفسك تقدمي إيه بعد كدة ، هل شايفة إنك ممكن تقدمي فيلم جامد أوي؟
آه ، وممكن أعمل فيلم يتكلم عن الأطفال وهقول خليهم يلعبوا ، عشان أنا كمان عايزة ألعب.

شاهد حوار منة عرفة وكليب تغني فيه "معانا ريال" و"الفار السندس" - 4 فيديوهات داخل الـ"بلاير"