حوار : محمد عاشور
تصوير : ياسمين السماحي

أصغر و"أشقى" نجمات الوسط الفني في الوقت الحالي ، وقد اشتهرت بعد تألقها في بطولتها الأولى مع النجم الكوميدي أحمد حلمي وفيلمه الأخير "مطب صناعي" ، أجرت الطفلة منة عرفة هذا الحوار مع موقع FilFan.com.

هل من الممكن نتعرف عليكِ أكثر؟ الجزء الأول
اسمي منة عرفة وسني سبع سنوات ، وأنا في الصف الأول الابتدائي

من الذي اكتشف موهبتك؟ الجزء لأول
كنت بحب اتفرج على الافلام واركز معاها وأقلد الفنانين.

كنت بتحبي تقلدي مين؟ الجزء الأول طنط منى زكي وخاصة في مسرحية "كده اوكيه" ، وطنط ياسمين عبد العزيز وأونكل أحمد حلمي.

كيف شاركت في أول عمل تمثيلي؟ الجزء الأول
أونكل سمير سيف هو اللي رشحني وهو اللي اكتشفني واظهر موهبتي.

وكيف دخلت عالم التمثيل من الأساس؟ الجزء الأول
طنط منى هي اللي رشحتني لأونكل أحمد بعد ما شاركت معاها في مسلسل "السندريلا" ، وخاصة انهم كانوا عايزين بنت صغيرة لفيلم "مطب صناعي".

هل لكِ صلة قرابة بعائلة عرفة؟ الجزء الأول
لا ده تشابه أسماء.

ما وصفك لأجواء كواليس فيلم "مطب صناعي"؟ الجزء الأول
كنا بلعب طول الوقت أنا وأونكل أحمد.

ما هي المشاهد الصعبة التي قدمتِها في الفيلم؟ "الجزء الأول
مشهد الغرق لأن الدنيا كانت ساقعه جدا ، وغير كده انا مبعرفش أعوم ، وهو ده اللي خلا المشهد يبان طبيعي.

كنت بتحبي تلعبي مع الكلب "روي" في الفيلم؟ الجزء الأول
ده عض ثلاثة في الفيلم ، وكان هيعضني وأنا في مشهد المرجيحه بتاع الأغنية ، وهو فك الحبل بتاعه وكان هيكلني ، وأنا فضلت اعيط ، وبعدين صمم أونكل أحمد إنه يمشي.

هل تشعرين باختلاف في شخصيتك بعد أن أصبحتِ نجمة؟ الجزء الأول
شوية أنا لسه مبقتش نجمه قوي ، وفي ناس بقت بتقربلي عن الأول ، يعني كان في ميس عندي في المدرسه مش بتقني ودلوقت تفضل تقلي يا منة يا حبيبتي الفيلم حلو أوي.

وهل تغيرت معاملتك لأصحابك أو شعرتي بالغرور؟ الجزء الأول
لا خالص أنا لسه بلعب معاهم عادي ، بس في وحده صحبتي قالتلي إنتي بقيتي مغرورة وانا مش كده وبتعامل معاها عادي ، وماما قالت لي اللي بيقولك كده هو اللي غيران منك وطنشيهم.

هل تتابعين الأفلام السينمائية؟ الجزء الأول
آه على طول وكان نفسي طول عمري أقدم فيلم زي "مطب صناعي".

ما هى آخر الأفلام التي شاهدتيها؟ الجزء الأول
أنا دخلت "أيظن" مرتين ، وآخر فيلم دخلته "محطه مصر".

بتحبي مين من الفنانين؟ الجزء الأول طنط منى وبشكرها جدا وأونكل أحمد حلمي ، وعايزة أمثل تاني مع أونكل وائل احسان عشان هو بيخِرِج حلو ، وأونكل عادل إمام وطنط ياسمين عبد العزيز.

هل شاهدتي أي فيلم للفنانة فيروز وهي طفلة؟ الجزء الأول
طبعا هي جميلة وانا شفتلها فيلم "دهب" وبحبها.

ما هي نوعية الأفلام التي تحلمين بتقديمها؟ الجزء الأول
مفيش نوع معين ، هجرب كله واللي هانجح فيه ممكن أقدمه تاني.


هل أصبح لكِ معجبين؟ الجزء الثاني
شوية.

هل ستستمري في مجال التمثيل أم ستتوقفي بعد أن تكبري؟ الجزء الثاني
أنا هكمل زي طنط منى.

ما هي احلامك المستقبلية؟ الجزء الثاني
اخش كلية الفنون الجميلة.

هل تجيدين الرسم؟ الجزء الثاني
أنا بعرف أرسم ورسمت فلاحه بحر وبيت وبوبي.

من مثلك الأعلى في التمثيل؟ الجزء الثاني
طنط منى وأونكل أحمد وطنط ياسمين وطنط شيرين.

هل تحبين الغناء؟ الجزء الثاني
شوية.

مع من تفضلين التمثيل في المستقبل؟ الجزء الثاني
أونكل عادل إمام وأونكل أحمد السقا وطنط ياسمين عبد العزيز وطنط منى.

ما هي نوعية الأفلام التي تتمني أن تقدميها للسينما؟ الجزء الثاني
أفلام استعراضية زي فيروز فيها رقص وغناء وشقاوة بس لازم يكون ليا شخصيتي الفنية مش زي حد.

ما هي آخر رسوماتك؟ الجزء الثاني
بحر وسماء وناس وشارع وشمس والدنيا بتمطر

هل تحبين المطر؟ الجزء الثاني
شوية وبحب سعات أجري تحتها.

هل تحبين البحر؟ الجزء الثاني
لا بخاف منه عشان مش بعرف أعوم

هل سببّ مشهد الغرق لكِ عقده من السباحة؟ الجزء الثاني
أنا بخاف من العوم في البحر بس بحب أعوم في البيسين لأنه على أد طولي ، وكنت بسيب التصوير في "مطب صناعي" عشان أعوم.

ما هي هواياتك؟ الجزء الثاني
نط الحبل وركوب العجل وركوب السيسي وبحب الجري جدا.

هل فكرتي في الاشتراك في فريق باليه؟ الجزء الثاني
بحب الباليه جدا وهاشترك فيه في الصيف.

هل انت متفوقه في الدراسة كما أنت في التمثيل؟ الجزء الثاني
الحمد لله بس أنا مش الأولى ، في واحدة زملتي هي اللي أعلى مني وبيوقفوها على الفصل.

كيف شاركت في حفلة الفنان تامر حسني الأخيرة؟ الجزء الثاني
أونكل تامر هو اللي كلمني وقالي أنا عازمك على الحفلة وهاغنيلك أغنية "انتي اللي عملتي لشباب الدنيا قلق" وطلعني معاه على المسرح وكنت مبسوطه أوي.

هل عرضت عليكي أفلام سينمائية مؤخراً؟ الجزء الثاني
أنا اتعرض عليا فيلمين سينما وأنا رفضتهم ، بس وافقت على المشاركة في مسلسلين هيتعرضوا في رمضان اللي جاي.

ما هي أمانيكِ وأحلامك الشخصية؟ الجزء الثاني
نفسي أبقى مشهورة وكل الناس تحبني زي ما أنا بحبهم وأنجح في شغلي.


شاهد منة عرفة تغني لموقع "في الفن"