قال الفنان هشام سليم إنه لم يترشح لمنصب نقيب المهن التمثيلية، لأنه ليست لدية الخبرة الكافية حتى وإن كان تاريخه التمثيلي كبير.

وأضاف خلال مداخلة هاتفية لقناة CBC Extra، الجمعة، "أنا اشتغلت مع الأستاذ أشرف زكي قبل كده ومعنديش مانع إني اكون الرجل التاني أو التالت أو الرابع، طالما احنا بندور على الصالح العام وهندور على مصلحة البلد قبل ما تبقى مصلحة فرد أو شركة أو منتج أو كاتب أو مؤسسة".

وعن توليه منصب وكيل النقابة في دورة سابقة قال هشام سليم: "أنا مش فاكر إن كنت وكيل ولا لأ مظنش اني كنت وكيل انا طول عمري عضو عادي مأخدتش وكالة قبل كده خالص".

وعن خططه إذا ما فاز بالانتخابات، قال: "أنا كل اللي بفكر فيه إن احنا نرجع للفن الراقي بفنانين راقين بآداب حديث بشكل محترم وخاصة في التليفزيون، أنا مش عاوز اتكلم على حاجات تانية ولكن أهم حاجة بالنسبالي دلوقتي ان احنا نحاول نتفق بينا وبين كممثلين أولًا إن احنا مفيش حاجة نقدر نعملها غير لو احنا نظمنا نفسنا ف الأول وبعدين نطلب من الناس التانية اللي هي مسؤولة برده انها توافقنا على مثلا إن الألفاظ البذيئة اللي بتطلع ف التلفزيون دي تتظبط، ونبين حلاوة الفن ونبين الحاجات الحلوة اللي ف بلدنا عشان لما لحد يتفرج عليها يقول يا سلام دي مصر فيها حاجة حلوة أروحها".

وردًا على سؤال يتعلق بإمكانية عمل إعادة مونتاج للأعمال التليفزيونية الرمضانية لحذف الإيحاءات أو الألفاظ الخارجة، أجاب: "لو لحقنا ياريت بس مظنش ان دا هيحصل السنة لأن الانتخابات هتبقى قبل رمضان بيوم، وأظن ان احنا هنلحق على السنة الجاية ان شاء الله نقدر نقعد مع الناس ونكون وضبنا بيتنا من الداخل ونكون اتفقنا على هذا واللي مش هيوافق على الكلام دا هنقعد معاه ونشوف آراءه ايه وإن شاء الله نوصل لحل لأن أنا متهيألي إن أي حد يهمه مصلحة البلد".

وعندما سألته المذيعة عن أعماله في شهر رمضان المقبل، قال هشام سليم: "ليه الأسئلة المحرجة دي أنا بقالي 3 سنين قاعد ف بيتنا والسنة اللي فاتت منعولي مسلسل، وقالوا اني ضد الدولة فبعد 43 سنة من تواجدي في مصر بقيت ضد الدولة مع الأسف"، قاصدًا بذلك مسلسل أهل اسكندرية.