كتب الشاعر عبد الرحمن الأبنودي قصيدة جديدة حملت اسم "مرسال"، وجهها إلى الرئيس عبد الفتاح السيسي بسببب غلاء الأسعار.
وكشف الأبنودي عن الرسالة في حواره مع الإعلامي وائل الإبراشي في برنامج "العاشرة مساء"، الذي بث عبر قناة "دريم" مساء السبت.
وقال الأبنودي خلال الحوار: "الناس مش معاها فلوس، حد ينزل للناس يشوفهم عايشين إزاي، بيتحايلوا على الحياة علشان يعيشوا، وتيجي الحكومة تزود أسعار العيش والجاز".
وأضاف: "الناس كرهتك بعد القرارات بـ 5 دقائق، والإخوان استغلوا الفرصة، وبدأوا يروجوا لأفكارهم".
الشعب عمره ما راح يعود للوهم.. والرجرجة في القول والأفعال
المسألة غياب سلوك الحسم.. في حرب جبارة جهاد وقتال
المسألة دعم أو مش دعم رايحين لفين أهو ده أهم سؤال
أنا مش مصدق مهما صدق العزم إنك تشيل الميه في الغربال
كله أخد على البلطجة والخم.. ومصر مرضانة مرضها عضال
الشهر يسحب خلف منه شهر.. تقع المروءة مهما هتكون شهم
يا أيها القبطان قانون البحر.. متخفش على الساري وخاف على اللحم
والشعب طاشي لا نظر ولا سمع.. وفضيت الساحة من الحرافيش
الدم متنكر في صورة دمع.. والكبد متمزع والقلب مفيش
فاحذر لسان مسموم بقولنا.. وقال وآخر النهار لا جدعنة ولا مال
عيون أزاز أما قلوبهم شمع.. والروح حتة شقف وضمير خيش
متتكلش على اللى مبيديش طواويس منفوشة هوادج ريش.. ويخافوا جدا من حكاية الجيش
زمان جه حاكم قلع الطرابيش.. وخد بأيد المنسي في التهميش
وأنت سمحت إزاي يغلوا العيش.. وسبت أهل النهب والتكويش
ناسك لو انصرفوا هيفضى الكون.. لو ناديت مش رح يرد سؤال
الفقراء ضاعوا لا مدد ولا عون.. كأنما الثورة خيال في خيال
يالى طردت شيطانها الملعون.. فارس ونعمه بسالة الخيال
تحت الفرس قلب الفقير مطعون.. ولا من سمع أنين فقير الحال
ضحك المرابي.. وداس على المديون.. والغالية رايحة ترهن الخلخال
فتحت قلبي وبحت بالمكنون والفقراء بعتني إليك مرسال.
ويعرف عن عبد الرحمن الأبنودي تأييده المطلق للرئيس السيسي، قبل انتخابه رئيسا لمصر.