فتح FilFan.com الباب لأصدقائه للخروج من دائرة القراء والمشاهدين ولعب دور النقاد فيما يتعلق بفيلم عمر وسلمى 3 ... طالع أفضل 6 آراء باختيار فريق عمل الموقع.

وتحول المشاهدون إلى نقاد من خلال صفحة FilFan.com على موقع Facebook حينما طلب منهم الموقع كتابة آرائهم في المستوى الفني للفيلم، الذي ظهر في دور العرض منتصف يناير.

واجتذب استطلاع "قول رأيك مع في الفن" 1089 مشاركة من محبي الصفحة، وتحدث كل منهم عن رأيه فيما يخص جميع عناصر الفيلم مثل التمثيل والإخراج والقصة.

ونعرض فيلما يلي مجموعة من أبرز الآراء التي ذكرها أعضاء الصفحة حول الفيلم، حسب رأي فريق الموقع، وأيضاً سنعرض مدى إعجاب المشاركين بما كتب حسب عدد الـLike التي أخذها كل نقد منهم.

جدير بالذكر أن معايير الاختيار تضمنت حجم الرأي (250 إلى 300 كلمة)، اللغة المهذبة لصاحب الرأي، وأخيرا تناول ملمح فني للفيلم.

1- Hala Omar

أنا شفت الفيلم ورأيي إن اختيار تامر موفق جدا في الفيلم خاصة إنه جاء بعد مسلسل آدم الذي كان مليئ بالدراما فا في الجزء الثالث من فيلم عمر وسلمى نجح تامر حسني في تحديد أهدافه مع بداية تتر الفيلم وحتى نهايته بعد أن قرر وبمنتهى الجرأة أن تكون الجرعة الكوميدية هي البطل الحقيقي للفيلم تليها بعض اللمسات الفنية التي لم يعتاد تامر على استخدامها من قبل في أفلامه، وقصة الفيلم كلنا نعلمها منذ الجزء الأول والثاني فاعتمد الجزء الثالث على الأحداث وقدم كوميديا جديدة غير المعتدين عليها استخدام تامر ل "الباروديه" تم التركيز على استخدامه في كثير من المقاطع الموسيقية التي واكبت مشاهد معينه مثل استخدامه لموسيقى فيلم "أيام السادات" أثناء مشهد خطف أولاده، واستخدامه لموسيقى مسلسل المال والبنون أثناء محاولته إقناع سلمى بعدم خيانته لها ليبدأ في البكاء مع دخول الموسيقى، ومشهد آخر يدخل من خلاله في معركة مع العصابة التي قامت بخطف أولاده وبعد أن ينجح في التغلب عليهم جميعاً وهو يرتدي ملابس الكاراتيه تبدأ أغنية صفاء أبو السعود الشهيرة عن مصر "بنحبك".

نجح تامر في استخدام "الباروديه" الموسيقي بشكل كوميدي في الجزء الثالث من عمر وسلمى، كما أنه استخدم الباروديه أيضاً في عدد من المشاهد بارتدائه ملابس شخصيات معروفة مثل سبايدر مان، واستخدامه لشخصية اللهو الخفي في المسرحية الشهيرة العيال كبرت.

وتقديم تامر للون جديد عليه وهو الغناء الشعبي وقد أعجبني أيضا تمثيل تامر حسني ومي والطفلتين، الفيلم كان هدفه منذ البداية تقديم جرعة ضحك كبيرة وصورة جيدة وديكورات مبهرة وهو ما نجح الفيلم فيه تماماً، فنحن في هذا الوقت نحتاج بشده للكوميديا المحترمة، وهو عائلي لكل أسرة يمكن أن تشاهده بدون أي خدش أو استياء، حقا أعجبني
14 Like

2- Stella della Notte

بصراحة تامر عمل فيلم مش متوقع أبدا الطبيعي من أي سلسلة أفلام إن الأجزاء القديمة بتبقى أحلى ..لكن الحقيقة إن تامر ضرب المعادلة دي ..وكل جزء ليه ستايله ومتعرفش تحكم أنهي أحلى فيلم منهم ..بالنسبة للجزء التالت الفيلم بجد اكستريم أوووي في الضحك ..من أول دقيقة لآخر ثانية ضحك مش طبيعي ...وبالرغم من إن قصة الفيلم لايت وخفيفة أوي إلا إن تامر بأداءه قدر يدخلنا جوه مود الفيلم مع الشخصيات وعشنا معاها أحلى ساعتين ..وفعلا كل الناس ضحكت لدرجة إن حتى بعد ما الفيلم خلص كل الناس خارجين بيضحكوا اووى بسبب الافيهات والمواقف اللى فى غاية الكوميديا ...فى وجهة نظرى ان تامر فى الفيلم ده تقريبا هو اللى شال الفيلم وكان قدها وادائه بيعلى وبيزيد فى فيلم عن اللى قبله وكان تلقائى جدا عكس مى عز الدين احيانا ردود افعالها كانت مش حلوة ..عجبنى اوى دور حسام الحسينى والاداء الكوميدى بتاعه..الاخراج متميز اوى لمحمد سامى وفيه روح شبابية اوى فى الصورة وده مناسب لاجواء الفيلم .. بالنسبة للقصة فى حاجة كمان تامر قدر يتلافاها فى الجزء التالت ..انه تقريبا مكررش الاخطاء اللى الناس انتقدتها بشكل كبير فى بارت1 و 2 ...الاغانى كمان كانت جامده اوى بالذات اغنية جرى ايه ياعينى احساس تامر عالى جدا واداءه للاغنية ولحنها متميز اوى لرحيم وكمان كلامهم جميل ومناسب لاحداث الفيلم ..تامر غنى شعبى حلو ياريت كل المطربين الشعبيين يبقى صوتهم حلو كده :)..من الاخر تامر وكل الكاست اجتهدوا جدا ويستاهلوا نجاح الفيلم والايرادات اللى الفيلم جابها لحد دلوقتى
4 Like

3- Ahmed Imam

كنت متوقع انه يكون افضل من كده بس للاسف المبالغة في "الكوميديا المصطنعة" كان سلبي اوي علي الفيلم وبعدين موسيقي تصويرية متداخله مع الاداء وتفاعل اثناء رده "ايه الموسيقي دي" سلبي جدا ده غير ان الالفاظ بذيئة بجانب ملابس البنات انا كنت حاسس اني في كباريه بجد اوفر في كل شئ سواء الفاظ او ملابس او موسيقي تصويرية والقصه مفيهش جديد يعني القصه 10 دقايق والباقي شو للموديلز لفيلم لا يصلح للاطفال من وجهة نظري
4 Like

4- Mahmoud Ahmed

أنا واحد من اقدم معجبى تامر حسني
لم أكن اتوقع ان يقدم تامر مثل هذا النوع من الأفلام
اعجبت بالجزء الأول والثانى كثيرا وكانوا بالكفاية المطلوبة على القصة
فا ظهر الجزء الثالث فى منتهى السطحية والفقر
النصف الأول من الفيلم مشع بالكوميديا الشديدة تكاد تسقط من على كرسى السينما من كثرة الضحك .. ولكنك وانت تنتظر فى النصف الثانى الحكمة والموعظة من هذا الجزء .. لا تجد شيئا سوى " القلش"
كان كل ما اخاف منه " كا واحد من جمهور تامر حسنى " هو ان ارى أحد من المشاهدين يترك السينما ويرحل !!
لكن لم يحدث الحمد لله ..
تمثيل تامر جاء فى هذا الجزء وهو يشوبه بعض الأصطناع او أجبار المشاهد على الضحك ..اما تمثيل مى عز الدين فا جاء مناسب الى دورها وقامت بأداءه بشكل طيب الى حد ما .. وكالعادة أحلى ما فى الفيلم هو الطفلتين ملك وليلي وخصوصا فى مشهد المحكمة .. فقر القصة وضعفها أثر بشكل سلبى وكبير على الأخراج وأداء الممثلين .
كم اتمنى ان يصل هذا النقد الى تامر لأنه من واحد من معجبيه
وأريد ان اقول له .. لا يمكن على الأطلاق بعد تقديم مسلسل بقوة آدم
وديو عالمى مع النجم شاجى , ان نقبل بعمل
فى مستوى عمر وسلمى 3 !!
أخطأت هذه المرة فى الأختيار يا صديقي :)
2 Like


5- ḾặhmØuĐ Ušif

انا شايف ان الفيلم بصراحه مأضفش اي حاجه , سواء لتامر او لعمروسلمي كقصه او زود نجاح تامر كممثل , تامر وصل للنضج الفني في فيلم نور عيني ومسلسل ادم , صعب جدا يقبل انه يعمل الفيلم دا خصوصا انه بقي فيه شويه ملل مجرد من انك تسمع ان فيه فيلم عمرو سلمي 3 ؟ هتقول من نفسك مش كفايه واحد واتنين !! وتتأكد الفكره دي لما تشوف الفيلم . انا شخصيا مش فاكر ولا افيه من الفيلم ولا فاهم فين قصه الفيلم ؟ او ايه لازم اختطاف الطفلين ؟ اللي المفروض هيا من عناصر المهمه للجزء التالت !! اولا مش حلوه ثانيا طريقه انقاذهم قريبه منه توم وجيري , وتوم جيري فيه ابداع اكتر اكيد + الملل بين الزوجين ؟؟ طب مهيا دي قصة الجزء التاني!! بصراحه الفيلم مش كويس خالص وانا من اشد اشد معجبين تامر ومن اكتر المدافعين عنه بس عشان بحبه .. الفيلم دا مش حلو
3 Like

6- Mayar EMad

الفيلم فى مجمله فيلم كوميدى معتمد على الديكورات و الموسيقى التصورية و المؤثرات الصوتية و البصرية بصورة كبيرة .....فالفيلم يبهرك منذ اللقطة الاولى بمنظر منزل عمر و سلمى الجديد و ديكوراته اضافة لملابس الممثلين خاصة تامر و مى ...اما القصة فكانت مليءة بالعيوب فالفيلم ناقش قضية الملل و الفتور بين الزوجين بطريقة مباشرة جدا منذ بداية الفيلم و بجمل و عبارات صريحة ...اضافة الى موضوع خطف البنات الغير واقعى بالمرة فكيف يعقل لاب ان يضع اولاده بين ايدى لصوص و بلطجية ليستعيد زوجته ..كما كانت ردود افعال جميع الممثلين تجاه هذا الامر فى منتهى السطحية فمى لم تستطع تجسيد شخصية الام القلقة على اطفالها فهى تتصرف بصورة طبيعية و تقرا الكتب و تجلس مع خطيبها و لم تنهار فى البكاء او تبدى اى مظاهر حزن شديد و لكن اعجبنى كثيرا الافكار المبتكرة التى قدمها تامر فى بعض اللقطات و الاستعانة بازياء و شخصيات مختلفة ....ففى المجمل فيلم عمر و سلمى فيلم جيد جدا من ناحية الاخراج و الديكور و الاغانى التى جاءت بشكل مميز و ممتاز و لكنه يفتقد الى قصة واقعية و قيمة تستحق التركيز فيها و مشاهدتها
15 لايك

شاهد إعلان الفيلم