إنجي المقدم: المجال الفني غدار ... ما بقاش يضايقني التعليقات السلبية وجلدي بقى تخين

FIlFan

FIlFan تاريخ النشر: الاثنين، 9 نوفمبر 2026 | آخر تحديث:

إنجي المقدم

حلت الفنانة إنجي المقدم ضيفة على برنامج "لمن يهمه الفن" الذي تقدمه أميرة نور على إذاعة "نغم إف إم".

ومن أبرز تصريحات إنجي المقدم خلال الحلقة:

-مش بحب أمسك في نوع معين من الأدوار، وبغير جلدي بسرعة

-أنا شخصية كلاسيكية جدا في الأصل، وبخاف من التغيير جدا في حياتي، لكن في الفن لازم أغير طبعا في أدواري

-كان حلم حياتي أكون ممثلة من وأنا صغيرة، وظروفي ما كانتش سامحة إني أدخل المجال الفني، ولما اتجوزت وخلفت اشتغلت مذيعة وبعد فترة قررت أسيب التقديم وأركز في التمثيل بس

-بنتي عندها ٢٤ سنة، وابني ١٦ سنة، وأنا أم من زمان على الرغم من إني بحس إن عيالي أعقل مني، وولادي بيتعاملوا معايا كأني أختهم

-المجال الفني غدار وقعدت ٣ سنين بدون عمل، واخترت أعيد حساباتي لفترة عشان ألاقي حاجة تناسبني

-حبيت جدا شخصية "كاميليا" في مسلسل "وتر حساس"، وصعبت عليا جدا وشدني الورق لما قريته بسبب علاقاتها المعقدة مع أهلها

-شخصية "علياء" في "الموناليزا" جذبتني واستفزنني جدا، واخدت دروس عشان أعرف أغير طبقة صوتي وأوصل للشخصية صح

-في مسلسل "ليالي أوجيني" الناس افتكرت إن ليا أصول ايطالية، واتفاجئت من حب الناس للشخصية واتبسطت جدا من رد فعل الجمهور

-كانت نقلة صادمة بالنسبة لي لما اتنقلت من دوري في مسلسل "ليالي أوجيني"، لدوري كصعيدية قصاد أحمد السقا في مسلسل "ولد الغلابة"، وكان تحدي كبير ليا واستمتعت جدا في الدور ده

-بشكر المخرج محمد سامي جدا لأنه ساعدني أطلع أحسن ما عندي في دور صفية الصعيدية بمسلسل "ولد الغلابة".

-لو كنت في زمن آخر كانت هتكون شخصيتي زي دور "صوفيا" في "ليالي أوجيني"، وبالرغم من إنه كان دور مجهد جدا بس اتبسطت بكل تفاصيله

-لما عملت دور جاسوسة في مسلسل "هجمة مرتدة" قولت الناس هتضربني في الشارع، وما خوفتش من كره الناس ليا بسبب الشخصية

- شخصية "شادية" في "كامل العدد" فيها شوية من شخصيتي الحقيقية، وكنت متحمسة للدور جدا وكان دور خفيف وممتع

-أكتر فنان بيني وبينه كيميا هو الفنان محمد ممدوح

-دينا الشربيني كل مرة بتفاجئني بموهبتها، وإحنا صحاب جدا

-إياد نصار ومحمد ممدوح ورشا مهدي من أقرب الناس ليا في الوسط الفني هما وعائلاتهم

-من قبل ما أقرا دوري في "الاختيار ٢" وافقت على طول لمجرد مشاركتي في دور وطني، وكنت حاسة إني عندي واجب قومي ولازم أكون جزء من العمل ده، لأنه شرف كبير ليا ووسام على صدري

-اتأثرت جدا بشخصية "صفية" الصعيدية في "ولد الغلابة"، وسابت جوايا غضب وعنف بعد التصوير، لدرجة إني كنت بتخانق مع جوزي وصديقتي لفتت انتباهي إني لازم أخرج برة الشخصية بعد التصوير بدل ما تضر حياتي

-إياد نصار من الشخصيات الكوميدية جدا في الحقيقة، ولو أنا واقفة معاه في مشهد كوميدي ممكن ما نقدرش نكمله من كتر الضحك

-لو هعمل عمل كوميدي هختار يكون بطله تايسون أو إياد نصار أو محمد فراج

-لو هسافر اي مكان هاخد معايا صبا مبارك ودينا الشربيني

-لو في سيناريو جايلي جديد اول حد باخد رأيه زوجي طلال

-نفسي أعيش شخصية من شخصيات فيلم "خلي بالك من زوزو"، ونفسي يتعاد إنتاج فيلم "نهر الحب" وأمثل فيه

-نفسي أمثل شخصية شجرة الدر، والفيلسوفة هيباتيا

إنجي المقدم وأميرة نور

-أخاف اقدم السيرة الذاتية لحد من الفنانات القدام

-ما بقاش يضايقني التعليقات السلبية، وبقى جلدي تخين

-خلصت تصوير مسلسل "قلب شمس" واتحدد عرضه في رمضان القادم من بطولة الفنانة العظيمة يسرا ومحمد سامي كممثل لأول مرة، ودرة ومجموعة كبيرة من النجوم، وبصور حاليا مسلسل "حليمة جبران" مع مي عمر وهيتعرض في رمضان وبعمل دور لذيذ وظهور خاص كأم للبطلة ياسمين العبد

-أوجه رسالة للأشخاص القساة على السوشيال ميديا، وبقولهم إحنا بني آدمين مش تماثيل وخليكوا حنينين وبالراحةوعلينا

- أنا شخصية بيتوتية جدا وبحب الطبخ وتحضير الأكل لأهل بيتي، وشايفة إن ده دوري الأساسي في الحياة

-بكره السوشيال ميديا كره عمى، وممكن أقفلها ما دام مش محتاجاها في حياتي، بس بستخدمها في شغلي فقط

-بحب الطبيعة جدا وبحب أربي كلاب وقطط

-الطاقة الأنثوية مش طاقة للمنافسة والصراع، وما ينفعش نبقى في خناق ولازم ندي حب وعاطفة وأمومة وحنية واهتمام ومشاعر، ومش بحب أدخل خناقات منافسات العمل

-بقول للي بينافسوا على الشغل إنها مش مستاهلة خالص