فيديو – أيتن عامر تعتذر لشيماء سيف: مستحيل وجع شفته في أختي أقبله على حد حتى لو معرفوش

محمد سليم

محمد سليم تاريخ النشر: الخميس، 29 أكتوبر 2026 | آخر تحديث:

أيتن عامر وشيماء سيف

حرصت الفنانة أيتن عامر على الاعتذار للفنانة شيماء سيف، بعد كشف الأخيرة أن أيتن عامر أحرجتها بحديث دار بينهما قبل فترة حول موضوع تأخر الإنجاب.

وقالت أيتن عامر في فيديو نشرته عبر حسابها في "فيسبوك": "اعتذار واجب للزميلة العزيزة شيماء سيف، أنا هبقى اعتذر لك قدام الناس كلها عن الموقف اللي حكيتيه في البرنامج إمبارح، والغرض الأساسي والأول من الفيديو أقوللك حقك عليا قدام الناس كلها، وأنا عايزة أرضيكي لإن إنت تعزي عليا وزعلك يعز عليا".

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

أيتن عامر

وأضافت: "لما قعدت أفكر مع نفسي اكتشفت إن إحنا كنا بنتكلم في القصة دي من 5 أو 6 سنين، وكنا أصلا بنتكلم عن موضوع الدايت وعمليات التكميم والمزايا والعيوب، وقلت لك ساعتها إن من ضمن المزايا إن عندي واحدة صديقتي كان الدكتور قال لها إن زيادة الوزن مؤثرة معاها شوية في موضوع الإنجاب، ولما عملت عملية التكميم ووزنها خس ربنا أكرمها والمشكلة اختفت".

وتابعت أيتن عامر: "وقتها مكنتش أعرف إن عندك مشكلة في القصة دي، وده اللي يثبت حسن نيتي، أنا لا كان قصدي أجرحك ولا أضايقك، وأكيد لو كنت رفعتي سماعة التليفون أو بعتيلي رسالة قلتيلي يا أيتن أنا زعلانة منك كنت هعتذر لك وأبوس راسك وأقوللك حقك عليا، وكانت خلصت من 5 أو 6 سنين".

طالع أيضا - مواجهة بين أشرف زكي ونجوى ابراهيم بسبب تصريحاتها عن فساتين النجمات في الجونة

شيماء سيف

وأكملت: "اللي مزعلني دلوقتي ليه 5 أو 6 بنتقابل وبتضحكي في وشي وتسلمي عليا عادي وإنت من جواكي زعلانة مني؟ كان حقي عليكي إنك تعاتبيني علشان متفضليش زعلانة مني كل ده".

وكشفت أيتن عامر عن تجربة شخصية مع معاناة تأخر الإنجاب في نطاق أسرتها قائلة: "أنا كان قدامي نموذج على القصة دي والمعاناة اللي الناس بتبقى حاسة بيها، أنا أختي الله يرحمها كانت بتنام كل يوم معيطة ونفسيتها زي الزفت بسبب كلام أهل جوزها وإخواته البنات على موضوع إنها متأخرة في الإنجاب، ومكانتش في إيدها حاجة".

وأضافت: "أختي عاشت مع جوزها 12 سنة، وتوفت في الآخر وهي بتحاول تجيب طفل عشان محدش يعايرها، مستحيل الوجع اللي شفته في أختي أقبله على أي حد حتى لو معرفوش".

وكانت شيماء سيف كشفت عن هوية زميلتها التي روت من قبل عن تعرضها بسببها لموقف محرج أمام زوجها محمد كارتر بسبب تعليقها على عدم إنجابها، وربطه بفقدان الوزن، مؤكدة أنها أيتن عامر، وليس بدرية طلبة أو انتصار، كما تردد وقتها. (التفاصيل)

وقالت شيماء سيف، خلال استضافتها في برنامج "تحت الضغط": "فيه ناس اتظلمت واتاخدت في الرجلين، واتقال إن اللي أحرجتني في موضوع الخلفة هي بدرية طلبة، مش هي عشان حبيبتي، واتقال إنها انتصار وبرضه مش انتصار، أيتن عامر هي اللي قالتلي كده، ودلوقتي إحنا تمام وبنسلم على بعض".