خاص- زهرة رامي لـ"في الفن": الإذاعة منستنيش التمثيل و"ميسرة" في "بنج كلي" بعيدة عن شخصيتي ومكنتش متوقعة أن إفيه "بيومي" ينجح بالشكل ده

نهال ناصر

نهال ناصر تاريخ النشر: الاثنين، 24 أغسطس 2026 | آخر تحديث:

زهرة رامي

من المشهد الأول لها في مسلسل "بنج كلي" تمكنت الفنانة زهرة رامي من لفت الأنظار، أوصلت إحساس الزوجة الحامل التي على خلاف مع زوجها سواء على اختيار اسم الطفل أو حتى خلافات أخرى لا نعرفها.

بأداء مزج بين الكوميديا والحزن كانت إطلالة زهرة رامي في دور "ميسرة" شقيقة دكتور "عزازي" في المسلسل وقصتها التي تنكشف يوما بعد الآخر.

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

تواصل FilFan.com مع زهرة رامي لتحدثنا عن المسلسل وكواليس العمل وتحضيراتها لشخصية "ميسرة".

يعرف الجمهور جيدا زهرة رامي الإعلامية ومذيعة ومخرجة الراديو، لكن جانب التمثيل قد لا يعرفه الكثيرون عنها، لذا حدثتنا عن حبها للتمثيل الذي لم ينقطع أبدا وقالت: "أنا ممثلة مسرح من قبل ما أكون مذيعة ومبطلتش أحب التمثيل ركزت أكتر في الإذاعة لكن لما بيجيلي مسرح بعمله، لما بيجي دور مناسب زي في 2014 عملت"نصيبي وقسمتك"، الفكرة أن اللي كان بيتعرض مش مناسب وفي وقت كنت محتاجة أركز أكتر في الإذاعة لكن طول الوقت باخد ورش".

نرشح لك: #شرطة_الموضة: هدى الإتربي بفستان قصير بطبعات ورود من Dolce & Gabbana ... سعره 170 ألف جنيه

"ميسرة" من مسلسل "بنج كلي"

وتابعت: "شاركت في "عايشة الدور" و"220 يوم" لحد ما ربنا كرم بمسلسل "بنج كلي" حسيت أنه أول دور يبين إني بعرف أمثل اللي فات كان شبه شخصيتي شوية في الهزار والضحك، لكن دا أول دور أظهر فيه إمكانياتي كممثلة".

المشهد الأول لـ"ميسرة" في المسلسل نرى زوجة حامل في طفلها الثاني تركت منزل الزوجية بسبب خلاف على اختيار اسم الطفل فهي ترفض بشدة "بيومي"، لكن هذا كان مجرد ستار لخلاف أكبر تعيشه، حدثتنا زهرة رامي عن الدور وتحضيراتها لها: "حبيت أن الشخصية بعيده عني تماما وفي عندها أزمة وتطورات بتحصل، ذاكرت الشخصية هي فيها حاجات كتير أوي سواء هي حاسه بإيه والحمل ومشاكله واللي بيحصل معاها كلمت دكاتره وكلمت أصحابي اللي خلفوا، لسه في مشاهد جايه هتظهر دا، هي الشكل اللي ظاهرة بيه ليه سبب حتى طريقة أكلها ودا كله بيؤدي لحاجات هتمر بيها، "ميسرة" مش شبهي أنا عملتلها تاريخ هي عرفت "صلاح" وبتشتغل إيه ومشاكلها إيه وحاسه بإيه في حاجات مش لازم يعرفها المشاهد بس أنا أبقى عارفاها ومصدقاها هي ليه وصلت للمرحلة دي".

وأكملت متحدثة عن تحضيرات الشخصية: "الشكل والستايل اللي ظهرت بيه كان بالاتفاق مع الاستايلست وأستاذة نادين خان من الأول متكلمين هي من أي طبقة اجتماعية وأنا معنديش أي مشاكل يعملوا أي حاجة في شكلي معنديش أزمة مش لازم أطلع حلوة، ولسه في تطورات للشخصية، أصعب المشاهد لسه جايه".

وأكدت زهرة رامي في حوارها معنا أن الكواليس كانت رائعة وأنها تحمست للمسلسل بمجرد معرفتها بفريق العمل وقالت: "الشغل مع نادين خان والكاست كله دياب وسلمى أبو ضيف وأسامة أبو العطا ولبنى ونس حمسني جدا، أجواء التصوير جميلة وأستاذة نادين جميلة وبثق فيها ثقة عمياء ببقى سايبه نفسي لأني متأكده أن في مخرجة شايفاني وعارفة بتعمل إيه، عملنا بروفات ترابيزة في البداية ومن الأول متفقين الشخصية هتظهر إزاي حزنها جاي منين، أول مشهد ظهرت بيه شخصية "ميسرة" لما كانت بتتخانق على اسم "بيومي" عدته كذا مرة كنت متوترة لسه مدخلتش في أجواء التصوير، وثقت في نادين لأن لما كان وحش قالت وحش ولما كان حلو قالتلي مش بتجامل".

في نهاية الحلقة السابعة رأينا "ميسرة" تمر بوعكة صحية، وحكت زهرة رامي لنا عن كواليس المشهد وقالت: "مشهد تعب "ميسرة" مش في السيناريو أنها هتقول "مش شايفه" لما قريت عن المرض اللي بيجيلها وذاكرت قلت لأستاذة نادين خان أن الأعراض ممكن متبقاش شايفه وجنبها بيبقى واجعها وهي وثقت فيا كان مكتوب "ميسرة" هتتعب لكن التفاصيل نفسها اشتغلت عليها مع نادين خان".

وتتفاعل زهرة رامي مع الجمهور حول المسلسل والشخصية وقالت إنها كانت لم تتوقع هذا التفاعل الكبير موضحة: "مكنتش متوقعة تعليقات الجمهور توقعت أن الناس هتاخد بالها من دوري بس مش من أول الحلقات كنت بقول لما يتفرجوا، مكنتش متوقعة أن إفيه "بيومي" الناس هتحبه ويبقى ترند مع أن شايفه أن محدش بيطلق عشان كده بس إحنا عملناه بجد مش كوميديا".

زهرة رامي

وبعيدا عن التمثيل زهرة رامي مخرجة إذاعية وفي رمضان من كل عام تقدم مسلسلات مع نجوم كبار بالإضافة إلى أنها تقدم برنامجا إذاعيا، وحدثتنا عن هذا الجانب من عملها وقالت: "أنا مش بحب حاجة أكتر من حاجة أنا مذيعة ولما ببقى على الهواء بحب شغلانتي، بنتج وبخرج مسلسلات إذاعية عشان بعمل دا من زمان وأصلا متربية في بيت فني أنا جدي أول مخرج إذاعي في صوت العرب أنا حضرت وأنا طفلة وعارفة الدراما من الإذاعية من زمان بتتعمل إزاي، وأنا اشتغلت في الدوبلاج واكتسبت خبرات، والإخراج الإذاعي ببقى كل سنة أفضل من اللي قبلها، أنا بشتغل كل حاجة أنها تحدي وبحبها، بحب إني مذيعة وبحب الإخراج الإذاعي والتمثيل وحتى الغناء لما بغني".