شهيرة: مفيش حد من الشيوخ كلمني عشان أتحجب وأخدت قراري عشان كنت عايزة أركز مع ربنا

نهال ناصر

نهال ناصر تاريخ النشر: الأحد، 16 أغسطس 2026 | آخر تحديث:

شهيرة

حكت الفنانة شهيرة كواليس قرارها بارتداء الحجاب وكيف اتخذت القرار فجأة دون تدخل من أي شخص أو مكالمات من شيوخ كما ردد البعض.

وقالت شهيرة خلال لقائها في برنامج "الصورة مع لميس" مع الإعلامية لميس الحديدي: "قبل ما أقرر إني أتحجب كنت قاعدة مع محمود ياسين في البلكونة وبكلمه عن مسلسل جديد، تاني يوم الصبح كان الجمعة وكنت بقرأ سورة "الحج" لقيت نفسي بعيط جامد وفجأة لقيت نفسي عايزة أبعد وأركز مع ربنا وابقى قريبة أكتر وأزود الطاعات".

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

وتابعت شهيرة: "مفيش حد من الشيوخ كلمني وشفت الشيخ الشعراوي بعد ما اتحجبت".

نرشح لك: التعليق الأول من ليلى أحمد زاهر بعد انتقادات حلقتها مع زوجها هشام جمال في AB Talks

وحكت كيف أخبرت زوجها محمود ياسين بقرارها وقالت: "هو كان في مكتبه في الدور اللي فوق في الفيلا، جبت الدادة وقلتلها زغرطي، نزل محمود يشوف في إيه قلت له أنا خلاص هقعد واتحجب أنا عايزة يبقى أنيسي ربنا، أخدني في حضنه وحاول يفهم سبب القرار ، قلت له أنا عايزة أبطل دلوقتي مش عايزة حاجة تشغلني، الشغل بياخد تفكيري دا صلواتي بعملها بسرعة قالي خلاص اللي إنتي عايزاه اللي يرحيك أعمليه".

وأكدت شهيرة أنها لم تندم أو تتراجع عن قرارها لمدة 28 عاما موضحة: "لم يحدث لي تأرجح لمدة 28 سنة، لما كبرت ومحمود حبيبي مش معايا بدأت أفكر مش في مهنتي في هوايتي، مستعدة أرجع أمثل لكن الحاجات اللي اتعرضت عليا منهم عملين في رمضان اللي فات بس محستش أن دا الرجوع بعد 28 سنة".