ياسر الطوبجي باكيا عن فترة مرضه: مكنتش متخيل أني غالي أوي على الناس كده

نهال ناصر

نهال ناصر تاريخ النشر: السبت، 18 يوليو 2026 | آخر تحديث:

ياسر الطوبجي

لم يتمالك الفنان ياسر الطوبجي دموعه خلال حديثه عن فترة مرضه.

وخلال لقائه في بودكاست "شقة التعاون" مع الفنان حسام داغر حكى ياسر الطوبجي قائلا: "الحمد لله عديت على خير الوعكة الصحية اللي مريت بيها وأنا دلوقتي في مرحلة التعافي، أنا عرفت الموضوع بالصدفة ودا من لطف ربنا بالبني آدم أنا كنت بتعالج من حاجة اسمها جيوب قولونية وهي عند الناس كلها والدكتور قالي أنت خفيت بس أنا كنت حاسس إني مش كويس في حاجة مش طبيعية كنت بخس بزيادة والدكتور يقولي طالما مفيش ظواهر معينة أنت تمام".

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

وتابع ياسر الطوبجي: "لحد ما ربنا بلطفه وكرمه بعتلي دكتور أنا بثق فيه مشفتوش من 10 سنين هو جراح شاف الأشعة وأصر إني أعمل منظار وياخد عينة، أنا كنت بأجل المنظار دا لأني كنت خايف منه، عملت المنظار وأخد العينة أخويا ومراتي خبوا عليا ومقالوليش في الأول كلمت أنا معمل التحليل وقالولي وكانت صدمة رهيبة".

نرشح لك: بـ3 ساعات نسائية بـ6 مليون جنيه وإطلالة تصلح للجنسين ... لوك عمرو دياب على بوستر ألبومه "حبيتك"

وأكمل موضحا أنه تواصل مع نقابة المهن التمثيلية وهم من ساعدوه في باقي الإجراءات قائلا: "عن طريق النقابة دكتور أشرف زكي قالي أنت محتاج جراح أورام لاستئصال الورم، أنا عرفت في أول شهر يناير وعملت العملية يوم 27 يناير قعدت في العملية 6 ساعات والحمد لله في الفترة دي اكتشفت كمية حب من الناس مكنتش متخيل أني أكون غالي أوي كده على الناس، وأنا بعمل العملية كان في ناس عيانين معايا كبار في السن كانوا بيدعولي".

واختتم ياسر الطوبجي حديثه: "أنا عمري ما اتكلمت في الموضوع دا بس أنا كويس والحمد لله رب العالمين أنا في نعمة كبيرة إني اكتشفت في المرحلة دي وربنا قدرني إن الصعب يارب يكون عدى واللي جاي كله يكون تعافي".