سامر أبو طالب يرد على رامي صبري: محدش جاب سيرتك ولو بترد على التليفون كنت كلمتك وعاتبتك

نهال ناصر

نهال ناصر تاريخ النشر: الثلاثاء، 2 يونيو 2026 | آخر تحديث:

سامر أبو طالب ورامي صبري

رد الملحن سامر أبو طالب على تصريحات الفنان رامي صبري التي قال فيها إن الملحنين لا يقدمون أي جديد لذا لا يرد المطربون عليهم.

وظهر سامر أبو طالب في فيديو عبر حسابه على Facebook وقال فيه: "مبحبش أطلع أتكلم عن أي حاجة وبحب احتفظ برأيي لنفسي وبركز في شغلي وبنجح والحمد لله خطواتي كويسة، بقالنا كام يوم زمايلي الملحنين والشعراء حاسين أن في تجاهل وطلعوا واتكلموا وقالوا كلمتين من قلبهم مضايقنهم وأنا ضميت صوتي لصوتهم، التجاهل هنا مش إننا بنشحت من حد أنه يبص علينا أو يسمعنا لأ فكرة التجاهل هنا إننا لما نبعت لحد عارفنا ومسجل أرقامنا وفي بينا كلام وقعدات مزيكا وفي ناس اشتغلنا معاهم قبل كده ونجحنا مع بعض ففكرة أن أنت متردش أصلا مش حلوة لا في حقك كنجم ولا في حقنا كفنانين وصناع لأن الموضوع دا مؤذي نفسيا تقدر بكل بساطة تقول لا مش عاجبني مش حلو مش اللي أنا عايزة ومحدش هيزعل بالعكس فكرة أنك ترد أصلا دا تقدير منك للشخص اللي بيبعتلك سواء جديد أو ليه اسم".

تابعوا قناة FilFan.com على الواتساب لمعرفة أحدث أخبار النجوم وجديدهم في السينما والتليفزيون اضغط هنا

وتابع ليوجه كلامه لرامي صبري: "هخص بالذكر النجم الكبير رامي صبري اللي أنا بحبه جدا على المستوى الشخصي وعلى المستوى الفني، مبدئيا محدش جاب سيرتك أصلا في الموضوع دا لا من قريب ولا من بعيد أه انت من الناس اللي مبتردش وأنت الوحيد اللي طلع اتهم الصناع أنهم معندهومش جديد لا اسمحيلي أقولك إحنا عندنا جديد ومتطورين وهتكلم عن نفسي أنا بشوف نفسي مميز جدا في حتتي وفي ألحاني وبعمل حاجات الحمد لله متطورة وجديدة أنت بس اللي مبتفتحش الشات تشوف سامر أبو طالب باعتلك إيه أو غيره".

نرشح لك: وفاة الفنانة سهام جلال عن عمر ناهز 54 عاما

وأكمل سامر أبو طالب: "قبل ما تتهمنا يا رامي افتح الشات واسمع عشان لما تتكلم يبقى عن حقيقة لكن الاتهام اللي اتهمته للناس وخصوصا أنهم ليهم أسامي وليهم نجاحات كبيرة، أنا عن نفسي نجحت مع الهضبة عمرو دياب في "معدي الناس" و"قمر إيه" ومع النجم تامر حسني في "ينهار أبيض وهيموت ويرجع، أنا بقالي 12 سنة ملحن وخطواتي فيها نجاحات وفي نجوم لسه متشرفتش أني اشتغل معاهم وبسعى إني اتعامل معاهم وابعتلهم، وأنت من ضمن النجوم يا رامي اللي حابب اشتغل معاك ولما تطلع تتهم الصناع الاتهام دا اسمحلي أرد عليك واقول لأ انت مش واخد بالك في ناس شطار سواء من جيلي أو جيل قبلي أو بعدي".

واختتم سامر أبو طالب كلامه: "أنت مكنتش موفق في التصريح اللي قلته محدش قال رامي صبري إحنا اتكلمنا عن المطربين عموما أنكم مبتقدروش الصناع، حط نفسك مكانا اللي بيبعتولك دول بيحبوك وعايزين يشتغلوا معاك أنا مش طالع بهاجمك وأنت لو بترد على التليفون كنت كلمتك وعاتبتك أنت أخويا الكبير مكنتش أحب أبدا أقول الكلمتين دول على السوشيال ميديا بس أنت اتكلمت على السوشيال ميديا وهرد عليك عليها".

وكان رامي صبري كشف عن رأيه بعد حديث بعض الملحنين عن تجاهل المطربين لهم وكتب: "عدم الرد على ملحنين ومؤلفين أو مبدعين بشكل عام، هو عدم التجديد، وإن مافيش أفكار مختلفة".

وتابع رامي صبري: "في ناس مضيقة اني كتبت ستوري إن الملحنين اللي بتبعتلي شغل ما بيعملوش حاجة جديدة ومختلفة ايوة دي حقيقة، يعني أنا أعمل الأغنية وخلاص عشان هي بتتبعتلي".

وأضاف: "أنا بعمل الحاجات اللي شايفها من وجهة نظري مختلفة وجديدة ودا مش المفروض يضايق حد، إحنا المشكلة مش في الملحنين والشعراء كلهم كويسين، لكن إحنا مطربين مش كتير، احنا في السوق المصري حوالي من 7 إلى 10 مطربين بالكتير خالص، والملحنين والشعراء كتير جدا".